Ci zdoleje BATE ŭtrymać pieramohu? Startuje novy čempijanat Biełarusi pa futbole

U sakaviku paśpieli adbycca matč za Supierkubak, a taksama čverćfinały Kubka Biełarusi, ź jakich hałoŭnym niaŭdačnikam vyjšaŭ barysaŭski BATE, jaki prajhraŭ baraćbu za abodva trafiei.

Pavialičyć

Čempijon Biełarusi ŭ pieršuju mižsiezonku biez Anatola Kapskaha padvierhsia surjoznym kadravym pieramienam. Siarod surjoznych strat — sierby Miłunavič dy Ivanič, biełarusy Palakoŭ, Vaładźko, Hardziajčuk i Sihnievič. Abnaŭleńnie kamandy ŭžo doraha abyšłosia kamandzie, i možna sprahnazavać, što jak minimum na starcie čempijanatu BATE budzie vielmi niaprosta.

Niaprosta musić być i minskamu «Dynama», jakoje za zimu stała samym zahadkavym kłubam vyšejšaj lihi. Dahetul praciahvajucca manipulacyi ź pierachodam kłuba ad Juryja Čyža inšamu ŭłaśniku, a novy hałoŭny trenier Raman Pilipčuk užo prajaviŭ siabie žorstkim mieniedžaram. Z dapamohaj fanataŭ, što viarnulisia na siektar, kamanda vyjšła ŭ paŭfinał Kubka i maje niebłahija šancy na pieršy za doŭhi-doŭhi čas trafiej.

Jašče try epapiei mižsiezońnia: sprečki za Paŭła Savickaha pamiž «Niomanam» i bresckim «Dynama», jakija dajšli navat da Ekanamičnaha suda Minska i mižnarodnych instancyj, abjadnańnie «Pramienia» z mahiloŭskim «Dniaprom», a taksama novyja fakty damoŭnych matčaŭ. U vyniku Brest pahadziŭsia vypłacić hrošy, kab nie patrapić pad sankcyi Fiederacyi futbołu, novaja kamanda ŭ Mahilovie budzie nazyvacca «Dniapro», a ad śledčaha kamiteta niama niejkich padrabiaznaściaŭ.

A ciapier pra kožny matč bolš padrabiazna.

«Minsk» — «Viciebsk»

• 29.03, 18:45. Minsk, stadyjon FK «Minsk»
• Kaeficyjenty: «Minsk» (pieramoha) — 3.65; ničyja — 3.38; «Viciebsk» (pieramoha) — 2.00

U «Minska» zimoj źmianiŭsia trenier (Andrej Razin zamiest Alaksandra Łuchviča), a taksama surjozna abnaviŭsia skład. Na miescy maładych hulcoŭ, na jakich źjaviŭsia popyt u biełaruskich topaŭ, pryjšli daśviedčanyja hulcy: Dźmitryj Klimovič, Illa Aleksijevič, Pilip Ivanoŭ, Leanid Koviel. Taksama ŭ biełaruski čempijanat viarnuŭsia Niemańja Nikalič, jaki niekali hulaŭ za BATE i minskaje «Dynama».

Mižsiezońnie «Viciebska» pačałosia sa strašnaj trahiedyi — u DTZ zahinuŭ bramnik Andrej Ščarbakoŭ. Paśla skład kamandy pakinuli lidary: Mikita Navumaŭ, Kirył Viarhiejčyk, Nienad Adamavič i Bruna Furłan. Paŭtaryć pośpiech minułaha siezona budzie vielmi składana.

Prahnoz «NN»: «Minsk» nie sastupić.

«Homiel» — «Nioman»

• 29.03, 20:45. Homiel, stadyjon «Centralny»
• Kaeficyjenty: «Homiel» (pieramoha) — 3.70; ničyja — 3.08; «Nioman» (pieramoha) — 2.11

Varta adznačyć, što ciapier rasijskija futbalisty bolš nie ličacca lehijanierami ŭ biełaruskim pieršynstvie. Tamu nie dziŭna, što ŭ našy kłuby (u tym liku i ŭ pieršaj lizie) chłynuli rasijanie. U «Homieli», naprykład, źjavilisia adrazu čaćviora futbalistaŭ z rasijskim pašpartam. Ci dapamoža heta kamandzie palepšyć letašni 12-y vynik — vialikaje pytańnie.

U «Niomanie», darečy, rasijan niama, ale ŭ mižsiezońnie źjaviŭsia kyrhyz Hulžyhit Ałykułaŭ, u jakim bačać druhoha Savickaha. Taksama varta adznačyć, što ŭ Homieli hrodziency nie prajhrajuć apošnija piać matčaŭ, a ŭ minułym siezonie abiedźvie hulni z «Homielem» skončylisia na karyść kamandy Ihara Kavaleviča.

Prahnoz «NN»: »Nioman» pieramoža.

«Isłač» — «Haradzieja»

• 30.03, 14:00. Minsk, stadyjon FK «Minsk»

«Isłač» musić stać hałoŭnym anderdoham čempijanatu. Kamanda Vitala Žukoŭskaha surjozna ŭzmacniłasia zimoj i vybiła BATE z Kubka Biełarusi. Hałoŭny trenier pastaviŭ zadaču nabrać 50 bałaŭ — heta prykładna 6—7 radok. Na siońniašni dzień taki płan bačycca całkam vierahodnym.

Pavialičyć

Try siezony ŭ vyšejšaj lizie «Haradzieja» zakančvała na dziaviatym radku. Ci zmoža narešcie palepšyć vyniki kamanda Jaromki biez vybyłych Dubaiča i Ihnacienki, pakaža čas. Ale zvyčajna startuje «Haradzieja» nie vielmi paśpiachova.

Prahnoz «NN»: »Isłač» pieramoža.

«Šachcior» — «Tarpieda-Minsk»

• 30.03, 16:00. Salihorsk, stadyjon «Budaŭnik»

Kamanda Tašujeva bačycca hałoŭnym kankurentam BATE za sioletniaje «zołata». «Šachcior» roŭna prajšoŭ mižsiezonku, padpisaŭ mocnych navičkoŭ i, zdajecca, zdoleŭ znajści zamienu Dzianisu Łapcievu ŭ vyhladzie charvata Darka Boduła. Salihorcy spakojna prajšli «Biełšynu» ŭ čverćfinale Kubka, na čarzie — start čempijanatu.

Minskaje «Tarpieda» ŭratavałasia ad vyletu tolki ŭ pieradapošnim matčy minułaha siezona. «Aŭtazavodcaŭ» vidavočna čakaje jašče adzin składany hod u baraćbie za miesca pad soncam.

Prahnoz «NN»: »Šachcior» pieramoža.

BATE — «Dniapro»

• 30.03, 18:00. Barysaŭ-Arena

Pra abiedźvie kamandy asabliva niama čaho dadać, akramia napisanaha vyšej. Paśla vyletu z Kubka kamanda praviała dadatkovy zbor u Sočy, a jaje skład papoŭnili rasijanin Chadžanijazaŭ, narviežac Jonasan i forvard zbornaj Biełarusi Anton Saroka, jaki staŭ, badaj, samym hučnym tranśfieram barysaŭcaŭ.

«Pramień» staŭ «Dniaprom» pa inicyjatyvie byłoha kiraŭnika Mahiloŭščyny Uładzimira Damanieŭskaha. Cikava, što budzie sa štučnym futbolnym prajektam paśla jaho hučnaj adstaŭki.

Prahnoz «NN»: BATE pieramoža.

«Dynama-Minsk» — «Słavija»

• 31.03, 14:00. Minsk, stadyjon FK «Minsk»

Minskaje «Dynama» startuje matčam z mazyrčukami, što padnialisia ź pieršaj lihi. Niebłahaja mahčymaść paśpiachova raspačać siezon pierad svaimi zaŭziatarami.

Da pačatku čempijanatu «Słavija» — hałoŭny, na naš pohlad, pretendent na vylet. I kamandzie Michaiła Marcinoviča pryjdziecca prykłaści šmat namahańniaŭ, kab nie viarnucca ŭ minor.

Prahnoz «NN»: »Dynama» pieramoža.

«Tarpieda-BiełAZ» — «Dynama-Brest»

• 31.03, 16:00. Žodzina, stadyjon «Tarpieda»

Biezumoŭna, matč tura.

Mižsiezońnie ŭ Žodzinie zajhrała jarkimi farbami, kali stała viadoma ab tajamničaj adstaŭcy Aleha Kubarava. Vadzim Skrypčanka, što pryjšoŭ na jaho miesca, kardynalna abnaviŭ skład, u jaki ŭvajšli jak viadomyja pa biełaruskich mierkach hulcy kštałtu Harbunova, Biehunova, Hajdučyk abo Sałaŭja, tak i lehijaniery z dośviedam hulni ŭ rasijskaj premjer-lizie.

Bresckaje «Dynama», vyjhraŭšy Supierkubak, znoŭ maryć pra čempijonstva. U minułym hodzie nie atrymałasia, moža, udasca ŭ hetym? Ale ŭžo ŭ pieršym tury «bieła-sinich» čakaje surjozny ispyt.

Prahnoz «NN»: totał bolšy za 2.5.

«Słuck» — «Enierhietyk-BDU»

• 31.03, 17:45. Słuck, stadyjon «Haradski»

Nahadajem, što «Słuck» prajhraŭ u dzieviaci apošnich turach letašniaha čempijanatu. U napałovu abnoŭlenaj kamandy jość niebłahaja mahčymaść pierarvać haniebnuju sieryju ŭ hulni z navičkami «vyški», ale nie ŭsio tak prosta.

Lehiendarny Anatol Jurevič sabraŭ cikavy małady kalektyŭ, jaki pačaŭ rychtavacca da siezona jašče ŭ śniežni, i ad jakoha čakajuć mnostva źniatych skalpaŭ.

Prahnoz «NN»: totał mienšy za 2.5.

Dzialiciesia prahnozami ŭ kamientarach, a taksama skarystajciesia spryjalnymi ŭmovami nadvorja i schadzicie na stadyjon! Ličycie siabie ekśpiertam u biełaruskim futbole — zrabicie staŭku ŭ Bukmiekierskaj kantory Marafon!

• 0
• 0
• 0
• 0
• 0
• 0
• 0
• 0