Nie atajesamlajma Ajčyny z režymam

Kamentar Valera Bułhakava da zajavy Alaksandra Fiaduty:

Pa-pieršaje, nie padmianiajcie paniaćciaŭ. Pa-druhoje, ciapierašniaja sytuacyja – lahičnaje nastupstva avanturnaj palityki Łukašenki. Pa-treciaje, kanflikt z Rasiejaj niachaj zrefarmuje śvietapohlad elity.

Zajava A.Fiaduty zvodzicca da idei, što apazycyi treba niejkim čynam padtrymać, raździalić kłopat ułady ŭ novych umovach, jakija ŭźniknuć u vypadku, kali ceny na haz uzrastuć utraja, a mo i ŭ čatyry razy. To bok biełaruskaja apazycyja ŭ hetaj sytuacyi musić vybirać pamiž niejkimi abstraktnymi ideałami, pryncypami i patryjatyčnym abaviazkam, kłopatam ab niezaležnaści našaj krainy. Chod takich razvažańniaŭ u mianie zaŭsiody vyklikaje adčuvańnie padmieny paniaćciaŭ.

U ciapierašnich varunkach pytańnie pra niezaležnaść Biełarusi nie staić. Kansensus ab suverenitecie faktyčna dasiahnuty za apošnija 15 hadoŭ: za niezaležnaść vystupaje i Łukašenka, i hramadzianskaja supolnaść, i, jak pakazvaje sacyjalahičnaje apytańnie, balšynia nasielnictva za niezaležnaść adnaznačna. I ŭ takich kantekstualnych varunkach mnie zdajecca, što havorka idzie pra spekulacyju i padmienu paniaćciaŭ. My traplajem ŭ pastku myśleńnia Łukašenki, dziaržaŭnych ideolahaŭ, jakija atajasamlivajajuć Biełaruś z sučasnym biełaruskim režymam.

Sytuacyja, jakuju my ciapier nazirajem, źjaŭlajecca lahičnym nastupstvam avanturnaj palityki Łukašenki, jaki nie chacieŭ uvieś hety čas zrazumieć sens imperskaj palityki Maskvy i praciahvaŭ zaihryvać z rasiejskim miadźviedziem. Toje, što my majem, sytuacyja, kali Rasieja rezka mianiaje praviły hulni, jość nastupstvam stratehična pamyłkovaj palityki režymu. Biełaruski kiraŭnik sprabavaŭ viarnucca da kanservatyŭnaj savieckaj madeli ŭzajemadačynieńniaŭ ź imperskaj metrapolijaj, što faktyčna robić jaho ŭ peŭnaj stupieni nastupnikam Mašerava: u abmien za palityčnuju lajalnaść i paskoranuju asymilacyju jon patrabavaŭ nieabchodnyja resursy pa nizkich cenach. Akurat siońniašniaja sytuacyja z hazavym šantažom z boku Rasiei pakazvaje, što hetaja madel dačynieńniaŭ nie pracuje, što Rasieja kruta mianiaje praviły hulni i joj nie cikavy taki symbaličny palityka-ekanamičny abmien. Rasieju u pieršuju čarhu cikavić inšaja systema dačynieńniaŭ, kali palityčnaja lajalnaść i resursy kanvertujucca ŭ zavajovy rasiejskaha kapitału na ŭnutranym rynku Biełarusi.

Łukašenka ž hetaha ŭparta nie chacieŭ razumieć i pryznavać.

Chacieŭ by tut zakranuć takoje pytańnie: toje, što adbyvajecca, nasamreč na ruku usim biełaruskim elitam, bo navat prałukašenkaŭskaja elita musić zrazumieć, što Rasieja nia niejkaja kazačnica, što vykonvaje ŭsie pažadańni za tak, što heta imperyjalistyčnaja kapitalistyčnaja dziaržava, jakaja pieraśleduje pieradusim niejkija svaje ŭłasnyja ekanamičnyja intaresy. Heta jak u nacyjanalistyčnym biełaruskim dyskursie isnavała mitalahizacyja biełaruskaha narodu jak samaha śviatoha, pryŭkrasnaha i vyklučnaha na eŭrapiejskim kantynencie, tak i ŭ praŭładnych kołach ŭźnikała mitalahizacyja Rasiei jak adzinaj apory, abapiercisia na jakuju možna ŭ luby čas i praktyčna zadarma, kab vyrašyć lubyja svaje ŭnutranyja prablemy. Heta zusim nia tak. I hety kanflikt, kali jon budzie raźvivacca pavodle žorstkaha scenara, musić paspryjać refarmavańniu śvietapohladu elity.

Tamu spekulacyi nakštałt fiadutaŭskaj mnie padajucca nie da kanca prymalnymi. Pytańnie pra biełaruskuju niezaležnaść nie staić, jano ŭzdymajecca tolki ŭ vyniku niejkich nia vielmi strohich u lahičnym planie pabudovaŭ palityčnych analitykaŭ. Nasamreč staić pytańnie pra vyžyvalnaść i stabilnaść łukašenkaŭskaha režymu ŭ novaj sytuacyi. Iznoŭ ža, pytańnie hetaje nia maje niejkaha prycełu na 2007 h. Uvohule isnuje mierkavańnie, što ŭ 2007 h. šarahovy biełarus nie adčuje na sabie padvyšeńnia cenaŭ. Prablema ž u tym, što łukašenkaŭcy vydatna razumiejuć: hetaje padvyšeńnie bje pa niejkim eventualnym čaćviertym terminie. Paprostu ŭ vyniku padvyšeńnia cenaŭ na haz budzie razburany toj de-fakta sacyjalny kantrakt, jaki jadnaje biełaruskaha prezydenta ź biełaruskim narodam. Kali papulisckija abiacanki dalejšaha rostu ŭzroŭniu žyćcia nia spraŭdziacca, u 2011 hodzie ŭ łukašenkancaŭ nia budzie arhumentaŭ na svaju karyść.

• 0
• 0
• 0
• 0
• 0
• 0
• 0
• 0