Novy hod 35-hadovy hamialčuk sustrenie nie doma ŭ kole siamji ź dziećmi, a ŭ SIZA Adesy. Miascovy sud aryštavaŭ jaho na dva miesiacy pa padazreńni ŭ ździajśnieńni ciažkich złačynstvaŭ, paviedamlać «Mocnyja naviny».
Pavodle palicyi, hramadzianin Biełarusi razam z saŭdzielnikami ŭvarvalisia ŭ kvateru 44-hadovaha adesita, užyli suprać haspadara ślozatačyvy haz i fizičnuju siłu, a zatym zapchnuli jaho ŭ svoj aŭtamabil, advieźli ŭ centr horada i vypichnuli z sałona. Paciarpieły adrazu ž źviarnuŭsia ŭ palicyju, paviedamiŭ pra abstaviny zdareńnia i prykmiety razbojnikaŭ.
U Adesie ŭviali admysłovy apieratyŭny płan «Pierachop». Praź niekalki hadzin na vyjeździe z horada pravaachoŭniki spynili ŭsiedarožnik, za rulom jakoha znachodziŭsia mierkavany złačyniec. Im akazaŭsia ŭradženiec Homiela. Pavodle jaho słoŭ, raniej jon nie sudzimy, va Ukrainu pryjechaŭ na zarobki, ale aficyjna nie pracaŭładkavany, a ŭ Biełarusi ŭ jaho dvoje niepaŭnaletnich dziaciej.
U dačynieńni da zatrymanaha śledstvam vyniesiena pastanova ab padazreńni ŭ ździajśnieńni złačynstvaŭ, praduhledžanych č. 3 art. 187 (razboj) i č. 2 art. 146 (niezakonnaje pazbaŭleńnie svabody čałavieka) KK Ukrainy. Biełarusu pahražaje pakarańnie ŭ vyhladzie pazbaŭleńnia voli na termin ad 7 da 12 hadoŭ.
Palicyja praciahvaje pošuk inšych udzielnikaŭ złačynstva.
Kamientary