Zabojcu milicyjanta prysudzili 23 hady źniavoleńnia. Ale jon i tak siadzić pažyćciova
45-hadovy Siarhiej Dzioŭkš — piersanaž z bahataj kryminalnaj bijahrafijaj. Za zabojstva traich jon byŭ asudžany jašče ŭ maładości. ŚMI paviedamlali cikavyja fakty pra adsidku Dzioŭkša. Naprykład, jon nibyta nie bajaŭsia kanfliktavać jak z administracyjaj kałonii, tak i z «błatnymi».
Pisali, što Dzioŭkšu sukamierniki złamali abiedźvie ruki za kartačnaje šulerstva.
Kali Dzioŭkš vyjšaŭ na volu, pryniaŭsia za staroje. U červieni 2001 hoda jon žorstka źbiŭ brata svajoj siabroŭki, ź jakim vypivaŭ. Pabity mužčyna pamior. Dzioŭkša abviaścili ŭ vyšuk, jon zataiŭsia. Praz dva miesiacy milicyja praviarała adnu z kvater pa vulicy Žukoŭskaha: padazravali, što žychary datyčnyja ci to da raspaŭsiudu narkotykaŭ, ci to da falšyvych hrošaj. Milicyja nie padazravała, što jakraz u hetaj kvatery i chavaŭsia Siarhiej Dzioŭkš.
Mužčynu paprasili pakazać dakumienty. Jon vyrašyŭ, što milicyjanty pryjšli pa jaho dušu, zamiest pašparta dastaŭ pistalet i zastreliŭ starejšaha apierupaŭnavažanaha Ihara Kaškana, supracoŭnika Kamiteta pa baraćbie z arhanizavanaj złačynnaściu. Paśla hetaha Dzioŭkš zdoleŭ źbiehčy.
U kancy 2002 hoda jon niejak zdabyŭ litoŭski pašpart. Pierakleiŭšy fota, Dzioŭkš zmoh vybracca ŭ Polšču. Žyŭ u Varšavie, pracavaŭ achoŭnikam u dyskakłubie.
Ale nieŭzabavie jaho zatrymali polskija pravaachoŭniki i pieradali biełarusam. U 2004 hodzie Dzioŭkš byŭ asudžany na pažyćciovaje źniavoleńnie.
Ciapierašni sud pakaraŭ Dzioŭkša za adzin sa starych epizodaŭ — uvosień 2001 hoda złačyncu ŭ čarhovy raz sprabavali zatrymać, ale jon iznoŭ prymianiŭ zbroju i try razy streliŭ u milicyjanta. Paciarpieły vyžyŭ.
13 studzienia 2020 hoda Dzioŭkša pakarali za staroje złačynstva. Jon atrymaŭ 23 hady źniavoleńnia.
Cichanoŭskaja i Zialenski ŭpieršyniu praviali sustreču. Zialenski zaprasiŭ Śviatłanu ŭ Kijeŭ14
Kamientary