Jak užo 20 hadoŭ hučnyja słovy Łukašenki pra dyviersifikacyju pastavak nafty strasajuć pavietra
Cytaty sabraŭ u siabie ŭ fejsbuku Vital Cyhankoŭ. «Nie baču ničoha radykalna inšaha, čym ciapierašni kanflikt adroźnivajecca ad usich raniejšych», — piša jon.
Kali razumnyja (bieź ironii) ahladalniki zajaŭlajuć, što voś ciapier užo ŭsio surjozna i pa-sapraŭdnamu, «heta ŭžo nie torh», «Łukašenka narešcie zrazumieŭ» i hetak dalej, prahnazujučy mocny stratehičny razdor pamiž Maskvoj i Minskam i značnyja pastaŭki alternatyŭnaj nafty ŭ Biełaruś, — pryznajusia, mnie ščyra chočacca hetym arhumientam vieryć. Ale na šlachu da zachoplenaj viery jość 2 istotnyja prablemy: 1. «Praktyka — kryteryj iściny» i 2. «Opyt, syn ošibok trudnych».
Nižej ja pryviadu cytaty Łukašenki roznych hadoŭ nakont nieabchodnaści zakuplać nierasiejskuju naftu.
«Nieadkładna prapracavać najaŭnyja varyjanty pa alternatyŭnych pastaŭkach enierharesursaŭ u Biełaruś. My nie možam dalej tryvać takuju zaležnaść i prynižeńnie ad adnoj dziaržavy» — 6 listapada 2002 hoda.
«Nam treba dyviersifikavać pastaŭki enierhanośbitaŭ u krainu. Heta pytańnie žyćcia i śmierci našaj dziaržavy. Heta naša zvyšzadača. I jaje treba vyrašyć. Pryčym u ramkach žorstkaj ekanomii biudžetnych srodkaŭ. My ŭ stanie heta zrabić i zrobim» — pasłańnie parłamientu 14 krasavika 2004 hoda.
«Nam treba pracavać nad dyviersifikacyjaj impartu enierharesursaŭ, vuhlevadarodnaj syraviny. Heta najvažniejšaja zadača, nad jakoj siońnia praciahvaje pracavać naš urad» — 14 studzienia 2007 hoda.
«Budziem dyviersifikavać pastaŭki. Kali da nas budzie ŭžyvać Rasija zaharadžalnyja pošliny, nieprymalnyja dla nas, jak heta zroblena, viadoma, my budziem šukać naftu tam, dzie nam zručniej i dzie lepš» — 4 maja 2010 hoda.
«Biez rasiejskaj nafty my abydziemsia. Nam budzie vielmi ciažka… Ale svaboda, niezaležnaść nie aceńvajecca nijakimi hrašyma» — 3 lutaha 2017 hoda.
«My kupim na rynku nafty, siońnia nafty kuplaj kolki chočaš — pytańnie ŭ canie» — 1 sakavika 2019 hoda.
Skažu adrazu: ja nie baču ničoha radykalna inšaha, čym ciapierašni kanflikt adroźnivajecca ad usich raniejšych. Usio ŭžo było: i azierbajdžanskaja nafta, i vieniesuelskaja, i značna bolš hroznyja słovy pra «teraryzm na najvyšejšym uzroŭni», i «Chrosnyja baćki» — i ŭsio viartałasia.
Tak što prypynieńnia siabroŭstva Biełarusi ŭ JEAES, vyvadu rasiejskich vajennych abjektaŭ, adklučeńnia rasiejskich telekanałaŭ, zakryćcia miažy — ničoha z hetaha, što sprahnazavaŭ (ładna, nie sprahnazavaŭ, a pradstaviŭ) Arciom Šrajbman u jakaści «palityčnaj fantastyki», ničoha z hetaha ŭ najbližejšyja hod-dva nie adbudziecca. (A kaliści moža adbycca, asabliva ž paśla źmieny ŭłady.)
Jany znoŭ pra ŭsio damoviacca. Nie viedaju, chto bolš prahniecca ad svajoj ciapierašniaj pazicyi — jak mnie padajecca, Rasieja. Ale damoviacca. Nadta blizkija i rodnasnyja režymy, nadta samotnyja hetyja «dva odinočiestva» na suśvietnaj mapie, kab surjozna pasvarycca.
Bolš za toje. Ja mahu dać svoj całkam surjozny (nie ŭ jakaści fantastyki) prahnoz. Pavodle vynikaŭ 2020 hoda ŭ ahulnym abjomie pastaŭlenaj nafty ŭ Biełaruś nierasiejskaja zojmie nie bolš za 10 pracentaŭ. Chutčej za ŭsio, heta ŭvohule buduć čysta simvaličnyja ličby, ale ja skažu aściarožna: nie bolš za 10 pracentaŭ. Chto-niebudź choča paspračacca?
Kamientary