«Kali my nie zrobim Biełarusi realnaj prapanovy partniorskich adnosin, u nas nie budzie šancu źviazać jaje ź jadrom Centralnaj Jeŭropy, — zajaviŭ u intervju polskaj haziecie «Rzeczpospolita» namieśnik ministra zamiežnych spraŭ Polščy Pavieł Jabłonski.
«Miarkuju, što Biełaruś — heta ŭ najbližejšyja hady adzin z našych absalutnych pryjarytetaŭ», — skazaŭ polski dypłamat.
Namieśnik ministra miarkuje, što ŭ apošnija hady Polšča «mocna skancentravałasia na Ukrainie», ź jakoj jana mieła ciažkaje minułaje, a Polščy śled pamiatać taksama pra Biełaruś, ź jakoj u jaje «ciažkaja ciapierščyna». «Tam prezident kiruje ćviordaj rukoj, ale vidać, što jon šukaje peŭnaj prapanovy z boku Zachadu. Toje, što jon nie pahadziŭsia na poŭnaje abjadnańnie z Rasijaj, poŭnaje padparadkavańnie, dobry prykład taho», — ličyć Jabłonski.
Jaho intervju apublikavavanaje ŭ časopisie «Plus Minus», dadatku da haziety «Rzeczpospolita», blizkaj da polskaha nacyjanalna-kansiervatyŭnaha ŭrada.
«Ja pierakanany, što pytańnie Biełarusi budzie klučavym, bo kali my nie zrobim Biełarusi realnaj prapanovy partniorskich adnosin, u nas nie budzie šancu źviazać jaje ź jadrom Centralnaj Jeŭropy», — dadaje dypłamat.
Jon paćvierdziŭ, što ź Biełarusi dachodziać sihnały takoha płana, choć časam i supiarečlivyja. «Ad našych pradprymalnikaŭ my majem infarmacyju, što supracoŭnictva nie zaŭsiody adbyvajecca naležnym čynam. Z druhoha boku, prychodziać sihnały, što biełarusy zacikaŭlenyja ŭ pavieličeńni prysutnaści Polščy ŭ ekanamičnaj śfiery. A heta, u svaju čarhu, viadzie da zbližeńnia ŭ adnosinach inšaha rodu», — tłumačyć Jabłonski.
Adnačasova jon zaścierahaje, što Polšča pavinna brać pad uvahu, jakija palityčnyja normy isnujuć u Biełarusi. «Było b lahčej, kab biełaruskija ŭłady pastupova źmiakčali palityčny režym», — padkreślivaje namieśnik ministra zamiežnych spraŭ.
Pa jaho słovach, na pytańnie mahčymaha zbližeńnia Biełarusi z Zachadam možna «hladzieć dvajaka». «Pastavić umovy, jakija biełarusy pavinny vykanać, kab dałučycca da nas u jakaści partniora, abo padyści da pytańnia prahmatyčna i dziejničać pakrokava ŭzamien za pastupovyja palityčnyja reformy», — kaža polski dypłamat.
Raniejšyja teoryi pra mahčymaść raptoŭnaha padzieńnia ciapierašniaj biełaruskaj ułady nie spraŭdzilisia, adznačaje jon.
«Naša meta — zaachvocić Biełaruś, kab jana mianiałasia, — kaža Jabłonski. — ale my kažam, što chočam supracoŭničać, choć nam niekatoryja rečy nie padabajucca. Nielha zmusić da hetych pieramien siłaj», — dadaje polski dypłamat.
Ciapier čytajuć
«Anlifanščyca ź Pinska» kaža, što jana nie anlifanščyca i nie ŭ rabstvie ŭ Mjanmie9
Kamientary