25 biełaruskich lekaraŭ roznych specyjalizacyj na ŭłasnuju inicyjatyvu zapisali trochvilinny videazvarot da biełarusaŭ. U im jany raspaviali, jak pavodzić siabie va ŭmovach pandemii karanavirusu, kab zaścierahčysia ad zachvorvańnia samim i źbierahčy blizkich, piša «Radyjo Svaboda».
Specyjalisty pryznajucca: ich pałochaje i naściarožvaje kolkaść fejkaŭ, a taksama durnych i absurdnych paradaŭ, jakija štodnia publikujuć u sacsietkach i pierasyłajuć adno adnamu ŭ mesendžery abyvacieli. Mienavita tamu jany razam zapisali videa z kampetentnymi rekamendacyjami.
Videazvarot zapisali stamatolah Maksim Zajcaŭ z Salihorsku, dermavienerolah Alena Kvitun ź Miensku, doktarka UZD Iryna Zasienka z Aksakaŭščyny, pedyjatarka Safija Sobal ź Miensku, terapeŭtka Anastasija Bandarenka ź Miensku, psichaterapeŭt Siarhiej Sakałaŭ ź Miensku, anestezijolah-reanimatolah Alesia Bchat ź Viciebsku, anastezijolah-reamanitolah Vasil Zacharevič ź Miensku, endakrynolah Ała Astapčyk ź Miensku, renthienolah Iryna Ražko z Barysava, renthienolah Iryna Žurava ź Miensku, kardyjolah Ała Sierabro ź Miensku, ankolah Viera Hračanik ź Bieraścia, epidemijolah Kaciaryna Ściapanava ź Bieraścia, słavackaja aftalmolah Iryna Achcierakava-Hiermuška, hiniekolah Śviatłana Krejer ź Miensku, chirurh Kaciaryna Miadźviedzieva ź Miensku, lekarka ahulnaj praktyki Maryna Šałamickaja ź Miensku, anastezijolah-reamanitolah Łarysa Puškarova ź Miensku, lekar chutkaj dapamohi Alaksandar Horbač z Baranavičaŭ, kardyjolah Viktoryja Chodkina ź Miensku, aftalmolah Halina Daščynskaja ź Miensku, sudmedekspertka Volha Judo ź Miensku, pulmanolah Volha Žarnasiek z Prahi, anastezijolah-reamanitolah, hałoŭny lekar dziciačaha špitalu Maksim Ačaretni ź Miensku.
Jak raspaviała «Svabodzie» adna ź inicyjatarak, pulmanolah Volha Žarnasiek z Čechii, hetaja ideja źjaviłsia ŭ aŭtorak i była realizavanaja litaralna za niekalki dzion:
— Niahledziačy na toje što ja z 2011 hodu nie žyvu ŭ Biełarusi, ja saču za padziejami, jakija tam adbyvajucca. U Biełarusi ŭ mianie baćki, siabry, kalehi. Mienavita tamu, kali ja pačała nazirać za padziejami vakoł sytuacyi z karanavirusam, mnie zachaciełasia choć trochi paŭpłyvać na sytuacyju. Maje siabry i svajaki pisali mnie paviedamleńni, što ŭsie bajacca, panikujuć, nia viedajuć, što rabić. Internet pierapaŭniajuć fejkavyja naviny, a heta sparadžaje paniku.
Mienavita tamu ŭ hetuju ciažkuju chvilinu zachaciełasia źviarnucca da ludziej i pasprabavać patłumačyć, što adbyvajecca. Hetaja ideja znajšła vielizarny vodhuk siarod lekaraŭ Biełarusi, i ŭ vyniku źjaviŭsia rolik za vielmi karotki čas — za 3 dni! My, lekary, źviarnulisia da narodu, kab dać adekvatnuju i abjektyŭnuju infarmacyju. U videa dadzienyja prostyja rekamendacyi, jak paźbiehnuć zaražeńnia i chto moža mieć najbolšuju ryzyku zachvareć. U ciapierašni čas nam vielmi patrebna padtrymka ludziej, kab vykonvalisia prostyja praviły i rekamendacyi, jakija ahučanyja ŭ videa. Dapamažycie nam, kab my zmahli dapamahčy tym, kamu my patrebnyja!
Ciapier čytajuć
Tolki žminda i lanivy nie padtrymlivaje «Nivy»! Vy možacie za chvilinu padtrymać «NN» padachodnym, nie patraciŭšy ni kapiejki svaich5
Kamientary