Probašč parafii Najśviaciejšaj Trojcy (sv. Rocha), kanonik ksiondz Juryj Sańko prosić aŭtaraŭ i arhanizataraŭ muzyčnaha klipa NELUBOV' ustrymacca ad jaho demanstracyi, paviedamlaje Minsk-Naviny.
Pieśniu vykonvaje Alaksandra Sałaviejčyk (Nagaina), režysior — Daniił Filipovič. Premjera klipa adbudziecca 21 červienia ŭ adnym sa staličnych baraŭ.
— U płanavanym da pakazu klipie vykarystoŭvajucca kadry, jakija byli źniaty ŭ pamiaškańniach kaścioła Najśviaciejšaj Trojcy (sv. Rocha) na Załatoj Horcy ŭ Minsku i na prylehłaj terytoryi bieź jakoha-niebudź dazvołu i ŭzhadnieńnia, — kaža Juryj Sańko. — Ja tolki papiarednie rastłumačyŭ stvaralnikam klipa, što sama pa sabie zdymka pamiaškańniaŭ chrama i prylehłaj terytoryi nie źjaŭlajecca pravaparušeńniem i moža ažyćciaŭlacca svabodna, pry ŭmovie vykanańnia paradku i pavahi relihijnych pačućciaŭ našych parafijan. U nas niama ni mahčymaści, ni žadańnia ažyćciaŭlać nahlad i cenzuru padčas zdymak. Pakazany mnie dla prahladu varyjant klipa vyklikaŭ pačućcio hłybokaha abureńnia. Nie asprečvajučy vysoki prafiesijanalizm stvaralnikaŭ, chaču padkreślić, što ŭ klipie vykarystoŭvajucca nieprystojnyja z punktu hledžańnia chryścijanskaj marali sceny seksualnaha charaktaru, hvałtu i zhubnych prychilnaściaŭ na fonie ałtara kaścioła Najśviaciejšaj Trojcy i miescaŭ na prylehłaj da chrama terytoryi, što vizualna adroźnivajucca i indyvidualna vyznačanyja. Pa hetaj pryčynie prašu aŭtaraŭ i arhanizataraŭ premjernaha pakazu hetaha tvora ŭstrymacca ad jaho demanstracyi.
Adpaviedny zvarot ksiondz nakiravaŭ aŭtaram klipa i arhanizataram pakazu. Jon nie vyklučaje, što ŭ vypadku publičnaj demanstracyi videa parafijanie kaścioła dla abarony svaich relihijnych pačućciaŭ i pravoŭ mohuć źviarnucca ŭ pravaachoŭnyja orhany.
Cichanoŭskaja i Zialenski ŭpieršyniu praviali sustreču. Zialenski zaprasiŭ Śviatłanu ŭ Kijeŭ14
Kamientary