Fihuranta «spravy Cichanoŭskaha» Arcioma Sakava źmiaścili ŭ karcar. Pryčyna taja ž — pavucińnie ŭ kucie kamiery
Apieratara «Krainy dla žyćcia», fihuranta spravy pa č. 1 art. 342 KK Arcioma Sakava, jaki ciapier znachodzicca ŭ SIZA-1 u Minsku, źmiaścili na piać dzion u karcar, a taksama jamu prysudzili novyja «sutki» administracyjnaha aryštu, paviedamlaje spring96.org.
Jak paviedamili «Viaśnie» svajaki palitviaźnia Sakava, pryčyna źmiaščeńnia ŭ karcar — pavucina ŭ kucie kamiery. Raniej za takoje ž parušeńnie praciahnuli termin znachodžańnia ŭ karcary na siem dzion błohieru Siarhieju Cichanoŭskamu.
Akramia taho, stała viadoma, što 29 červienia ŭ Karmianskim rajonnym sudzie (Arciom rodam z Karmy, Homielskaja vobłaść) razhladałasia administracyjnaja sprava ŭ adnosinach da Sakava pa artykule 23.34 KaAP (Udzieł u niesankcyjanavanym masavym mierapryjemstvie). Jaho sudzili za toje, što jon nibyta ŭdzielničaŭ treciaha traŭnia ŭ mitynhu ŭ Mazyry — u toj dzień Siarhiej Cichanoŭski rabiŭ repartaž pra miascovy dom-internat, jaki ŭłady chacieli začynić. I choć nasamreč u toj momant Sakaŭ znachodziŭsia ŭ inšym miescy ŭ horadzie, heta nie pieraškodziła sudździ prysudzić jamu 7 sutak administracyjnaha aryštu.
Pra hety sud svajaki Arcioma daviedalisia postfaktum, i tamu nichto ź ich nie zmoh tudy patrapić. Viadoma, što palitviazień z dapamohaj advakata budzie abskardžvać hetaje rašeńnie.
Taksama, pa słovach maci Arcioma Sakava, na jaho składzieny pratakoł za ŭdzieł u niesankcyjanavanym mierapryjemstvie ŭ Žłobinie 8 krasavika, kali Cichanoŭski braŭ intervju ŭ miascovych žycharoŭ.
Nahadajem, što 2 lipienia Arciom Sakaŭ praź videasuviaź u Hrodnie byŭ asudžany na 5 sutak aryštu pa artykule ab drobnym chulihanstvie (17.1 KaAP). Pa pakazańniach śviedkaŭ-amapaŭcaŭ, jakija zatrymlivali Sakava 31 traŭnia, toj nibyta łajaŭsia matam, ale padrabiaznaści śviedki zhadać nie zmahli. Taksama administracyjnyja aryšty pamieram ad 5 da 15 sutak atrymali ŭsie fihuranty «spravy Cichanoŭskaha», zatrymanyja paśla incydentu ŭ Hrodnie.
-
«A Łukašenka nie ŭ kursie, adkul byŭ napad na hetu asfaltavanuju darohu?» U vioscy praviali viełaprabieh — ale ŭsia ŭvaha dastałasia darozie
-
Miljanier Varabiej atrymaŭ prava na zabudovu centra Minska — uzamien za darahuju kliniku dla Łukašenki
-
Minčuki ŭ čacie paskardzilisia na pracu palikliniki. Prapahanda abvinavaciła ŭ čerhach samich naviedvalnikaŭ
Ciapier čytajuć
Miljanier Varabiej atrymaŭ prava na zabudovu centra Minska — uzamien za darahuju kliniku dla Łukašenki7
Kamientary