Biełaruskamoŭnamu ajcišniku, jakoha zakinuli ŭ adzin aŭtazak razam z bratam, dali 10 sutak
Druhija sutki braty-ajcišniki Viktar i Alaksandr Kuŭšynavy, jakija vypadkova sustrelisia ŭ aŭtazaku, siadziać u izalatary na Akreścina, piša Tut.by.
Pieršaj słuchajuć spravu biełaruskamoŭnaha Alaksandra Kuŭšynava, jon pracuje ŭ IT-kampanii Gurtam. Alaksandr znachodzicca ŭ izalatary, adkul jaho apytvajuć pa skajpie.
Alaksandr kaža ŭ sudzie, što ŭviečary 15 lipienia pryjechaŭ na płošču Niezaležnaści, kab padać skarhu ŭ Centrvybarkam, jaki admoviŭ u rehistracyi kandydatami ŭ prezidenty Viktaru Babaryku i Valeryju Capkału. Kali CVK začyniŭsia, mužčyna na viełasipiedzie pajechaŭ dadomu, ale pakolki AMAP zaharadziŭ piešachodnuju častku, jon sam padjechaŭ da milicyjantaŭ, kab spytać, ci moža jon prajści prama.
— Adzin supracoŭnik pahadziŭsia, ale potym kamandzir AMAPa skazaŭ «Zabirajem!», i mianie na rovary padniali ŭ aŭtazak, šlacham pavietranaha pieralotu, — patłumačyŭ Alaksandr. — Nijakaha supracivu pry transpartoŭcy mianie nie akazvaŭ. Ja na rovary znachodziŭsia, tak razam ź im i ŭźlacieŭ. Nikoha z supracoŭnikaŭ AMAPa rukami ja nie čapaŭ.
Pieršapačatkova śviedki-amapaŭcy, jakija zatrymlivali Alaksandra, śćviardžali, što ŭziali jaho na vulicy Miaśnikova, 26 (heta budynak Ministerstva finansaŭ), adnak fiejeryčnaje zatrymańnie trapiła ŭ abjektyŭ fotakamier, na zdymkach dobra vidać, što bajcy niasuć na rukach Kuŭšynava na rovary, a za śpinaj — płošča Niezaležnaści, pobač — haścinica «Minsk» (heta praśpiekt Niezaležnaści, 11). Heta značyć, što adlehłaść pamiž nazvanym u pratakole miescam zatrymańnia i sapraŭdnym miescam zatrymańnia — 1,5 kiłamietra. Incydent paśpieli źniać na videa, vidać, što śviedka pytajecca, «za što zatrymali, jon ža prosta spytaŭ, jak prajechać».
Jak supracoŭniki AMAPa tłumačać takoje niesupadzieńnie? Vyśvietlić u sudzie hetaha nie ŭdałosia.
U materyjałach spravy prosta źmianili adras, ciapier Alaksandra Kuŭšynava zatrymali na praśpiekcie Niezaležnaści, 11, to-bok kala hatela «Minsk».
Sudździa vypisaŭ Alaksandru Kuŭšynavu 10 sutak aryštu, doma zastajecca jaho žonka i čaćviora dziaciej.
Taksama siońnia buduć razhladać spravu jahonaha brata Viktara. Jaho zatrymlivali tyja ž amapaŭcy, što i Alaksandra. Viktar znachodziŭsia kala Hałoŭpaštamta, ale ŭ pratakołach byŭ taksama paznačany adras Miaśnikova, 26.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary