Biełaruski kiraŭnik pakul nie daŭ stanoŭčaha adkazu.
Ministr zamiežnych spraŭ Čechii Kareł Švarcenbierh pieradaŭ Alaksandru Łukašenku zaprašeńnie na samit Uschodniaha partniorstva, jaki maje prajści ŭ Prazie 7 traŭnia.
Ale biełaruski kiraŭnik pakul nie daŭ nijakaha adkazu. Pra heta Kareł Švarcenbierh paviedamiŭ na sustrečy ź biełaruskimi žurnalistami.
Tamu pytańnie, chto voźmie ŭdzieł u samicie Uschodniaha partniorstva ŭ Prazie (Łukašenka, ministr zamiežnych spraŭ Biełarusi Siarhiej Martynaŭ) zastajecca adkrytym.
Heta vyrašycca ciaham nastupnych dzion.
***
Biełaruś u stanie samastojna naładzić dobryja adnosiny ź ES, biez pasrednikaŭ.
Pra heta zajaviŭ prezident Biełarusi Alaksandr Łukašenka siońnia na sustrečy ź ministram zamiežnych spraŭ Čechii Karełam Švarcenbierham.
«Budučy zacikaŭlenymi ŭ supracoŭnictvie ź Jeŭrapiejskim sajuzam, my nie raz zajaŭlali, što nie majem patreby ŭ pasrednikach u adnosinach pamiž Biełaruśsiu i ES. My sami ŭ stanie, kali takoje žadańnie budzie z boku Jeŭropy, naładzić dobryja adnosiny pamiž Biełaruśsiu, jakaja źjaŭlajecca jeŭrapiejskaj dziaržavaj, i Jeŭropaj», — padkreśliŭ prezident.
Kiraŭnik dziaržavy paćvierdziŭ, što ŭsie ŭ Biełarusi zacikaŭleny ŭ naładžvańni narmalnych adnosin ź ES. «Apošnim časam čuvać hałasy, u asnoŭnym, viadoma, adsiul, źviernutyja da vas, što Łukašenka, maŭlaŭ, padmanvaje Jeŭropu, niešta abiacaje, a potym nie vykanaje.
Vy pavinny dakładna viedać i razumieć: usio, što my abiacajem, — niaŭchilna vykanajem, toje, što nie možam zrabić, — my adrazu skažam, što zrabić nie možam i nie budziem, i rastłumačym čamu», — skazaŭ Alaksandr Łukašenka.
Prezident taksama dadaŭ, što rady bačyć u Minsku pradstaŭnika Čechii — «nie čužoj nam krainy», tym bolš pradstaŭnika ES i dziaržavy, jakaja staršynstvuje ciapier u Jeŭrasajuzie.
U svaju čarhu Kareł Švarcenbierh paćvierdziŭ, što dla dyjałoha Biełarusi i ES nie patrebny pasredniki, baki mohuć pra ŭsio damovicca sami. Jon adznačyŭ prahres u vybudoŭvańni hetych adnosin i zapeŭniŭ, što tyja prablemy, jakija isnujuć, baki ŭ stanie vyrašyć razam.
«Dla nas Biełaruś — jeŭrapiejskaja kraina i zaŭsiody joju była. Adzinaje, u čym my pavinny pakłaści novy start, — heta adnosinam pamiž Biełaruśsiu i Jeŭrasajuzam»,— skazaŭ ministr zamiežnych spraŭ Čechii. Jon taksama dadaŭ, što ideja «Uschodniaha partniorstva» zaklučajecca ŭ nieabchodnaści ŭstanavić bolš intensiŭnyja adnosiny.
Kamientary