Palityk Alaksiej Navalny zajaviŭ, što pierad publikacyjaj rasśledavańnia, u jakim havaryłasia, što za jaho atručvańniem staić hrupa supracoŭnikaŭ FSB, jon razmaŭlaŭ pa telefonie z adnym ź ich — Kanstancinam Kudraŭcavym — i toj faktyčna paćvierdziŭ, što Navalnaha mieli namier zabić. Pra heta Navalny raspavioŭ u svaim videaroliku «Ja patelefanavaŭ svajmu zabojcu. Jon va ŭsim pryznaŭsia», piša meduza.io.
Jak raspavioŭ Navalny, zvanok byŭ zrobleny ranicaj 14 śniežnia — za niekalki hadzin da publikacyi rasśledavańnia. Pavodle jaho słoŭ, z dapamohaj «najpraściejšaj prahramy, jakimi karystajucca telefonnyja prankiery», jon schavaŭ svoj numar i zamiest jaho padstaviŭ śpiecyjalny numar kamutatara, ź jakoha supracoŭniki FSB rabili adzin adnamu zvanki.
«Raźlik prosty. U siem ranicy zvanok. Ty bačyš znajomy słužbovy numar, biareš trubku i pačynaješ razmaŭlać. Amal usie, kamu ja telefanavaŭ, słuchaŭku ŭziali, amal usie jaje chutka paviesili. A potym nas čakała vialikaja ŭdača», — raspavioŭ Navalny: z Kanstancinam Kudraŭcavym palityku, pa jaho słovach, udałosia pahavaryć kala 45 chvilin.
U razmovie, poŭnuju rasšyfroŭku i aŭdyjozapis jakoha apublikavała vydańnie The Insider, Navalny pradstaviŭsia pamočnikam sakratara Rady Biaśpieki Mikałaja Patrušava — pavodle lehiendy, jon chacieŭ rastłumačyć niekatoryja detali apieracyi, kab dać dakład načalstvu. U pryvatnaści, jon spytaŭ, čamu apieracyja nie zaviaršyłasia śmierciu Navalnaha.
Hołas, jaki, jak śćviardžaje Navalny, naležyć Kudraŭcavu, zajaviŭ, što ličyć apieracyju dobra spłanavanaj, a jaje niaŭdaču śpisaŭ na źbieh abstavin — jon vykazaŭ zdahadku, što heta adbyłosia z-za zanadta chutkaj pasadki samalota ŭ Omsku i apieratyŭnych dziejańniaŭ bryhady chutkaj dapamohi ŭ aeraporcie.
Surazmoŭca Navalnaha taksama raspaviadaje, jak ačyščaŭ kanfiskavanuju vopratku palityka ad śladoŭ «Navička». Pavodle jaho słoŭ, asablivaja ŭvaha pry ačystcy było nadadziena švam na ŭnutranym baku trusoŭ.
Mierkavany Kudraŭcaŭ taksama nazvaŭ proźvišča jašče adnaho supracoŭnika FSB, jaki ŭdzielničaŭ u apieracyi — Vasilija Kałašnikava. Jak piša The Insider, Kałašnikaŭ źjaŭlajecca ekśpiertam u halinie vyjaŭleńnia mietabalitaŭ niervova-paralityčnych ahientaŭ u bijałahičnych uzorach. Źviestki bilinhu pakazali, što paśla taho jak Navalny trapiŭ u komu, jamu telefanavaŭ Stanisłaŭ Makšakoŭ, jakoha aŭtary rasśledavańnia ab atručeńni nazyvali kiraŭnikom hrupy.
Navalny apublikavaŭ jašče adnu razmovu, u jakoj jaho surazmoŭcam źjaŭlajecca niejki «Michaił» — pa słovach Kudraŭcava, jon vydaŭ jamu vopratku dla ačystki (The Insider piša, što heta Michaił Jeŭdakimaŭ, načalnik rehijanalnaha ŭpraŭleńnia FSB pa baraćbie z teraryzmam). Jon admoviŭsia detalova abmiarkoŭvać z Navalnym apieracyju pa niezašyfravanaj telefonnaj linii, ale paćvierdziŭ, što pieradavaŭ Kudraŭcavu vopratku palityka.
Kamientary