Vykładčyka BDU pa jurydyčnaj etycy abvinavacili ŭ łajancy ŭ padjeździe i aryštavali na 15 sutak
Byłoha vykładčyka kafiedry kryminalistyki BDU Jarasłava Kota siłaviki zatrymali 9 lutaha, a ŭ jaho kvatery praviali pieratrus. Na noč Jarasłava źmiaścili ŭ IČU na Akreścina, paviedamlajuć pravaabaroncy.
Siońnia jaho spravu pa art. 17.1 KaAP (Drobnaje chulihanstva) razhladała sudździa Maryna Fiodarava ŭ sudzie Savieckaha rajona Minska. Na sudzie stała viadoma, što jaho abvinavacili ŭ tym, što dniom 9 lutaha jon nibyta łajaŭsia ŭ padjeździe svajho doma.
Pa pratakole Jarasłaŭ «naŭmysna z chulihanskich pamknieńniaŭ staŭ vykazvać niezadavolenaść pracaj supracoŭnikaŭ unutranych spravaŭ, razmaŭlaŭ na padvyšanych tonach, vykazvaŭ u adras supracoŭnikaŭ kiepskija słovy».
Ale ŭ vykładčyka inšaja viersija: «U 12.10 pačuŭ intensiŭny zvanok u dźviery, jon padyšoŭ, kab daviedacca, chto tam. Vočka było niečym zakryta, tamu jon paprasiŭ adkryć jaho i pakazać paśviedčańnie, ale zamiest jaho ŭbačyŭ čornyja siłuety. Jon pryadčyniŭ dźviery, i na jaho adrazu nakinulisia. Jon spałochaŭsia, što jaho vykradajuć, i pačaŭ kryčać susiedziam, kab vyklikali milicyju. Ludzi, jakija jaho zatrymlivali, byli ŭ čornaj vopratcy, kiepkach i maskach». U suviazi z čym supracoŭniki HUBAZiKa praviali pieratrus, pakul nieviadoma.
Jarasłaŭ raspavioŭ, što jaho pavalili na padłohu i cisnuli na patylicu i šyju, a potym zašpilili kajdanki. Z 18.45 da 00.00 Jarasłaŭ pravioŭ u bietonnaj kamiery.
Sudździa pryznała Jarasłava vinavatym pa art.17.1 KaAP i pryznačyła 15-sutačny aryšt.
Jarasłaŭ Kot vučyŭsia ŭ Jelskim univiersitecie ŭ ZŠA i ŭ BDU. Vystupaje ź lekcyjami ŭ biznes-škole IPM, zajmajecca jurydyčnym supravadžeńniem biznesu. Da vieraśnia pracavaŭ na kafiedry kryminalistyki jurfaka BDU.
Kamientary