Biełaruskija palityki šukajuć novyja šlachi dla daniasieńnia svaich dumak i idej siarod ludziej. Chtości pravodzić šosty Usiebiełaruski narodny schod, a chtości — rehistrujecca ŭ zvyšpapularnaj apošnim časam sacyjalnaj sietcy ClubHouse.
Pasłuchać, paspračacca, vykazać svaje mierkavańni ŭ razmovie sa Śviatłanaj Cichanoŭskaj, Paŭłam Łatuškam i Frankam Viačorkam sabrałasia bolš za tysiaču čałaviek. Heta novy farmat — ty možaš naŭprost zadać chvalujučaje pytańnie palitykam, albo vykazać svaju dumku, što treba rabić dalej.
Dadzienaja sustreča była pieršaj, kali farmat paličać paśpiachovym, to praciahnucca jany dalej. Tema spatkańnia — Biełaruś paśla Łukašenki.
«Biełaruś budučyni dla mianie — heta novyja demakratyčnyja vybary. Paśla vybaraŭ — pryniaćcie novaj Kanstytucyi. Pabudova parłamiencka-prezidenckaj respubliki, dzie za prava farmiravać buduć vieści palityčnyja partyi. Paŭnamoctvy parłamienta i prezidenta buduć prapisanyja tak, kab vyklučyć mahčymaść uzurpacyi ŭłady.
U ekanomicy — aktyŭnaja, rynačnaja ekanomika. Častkova pryvatyzacyja, stvareńnie novych halin ekanomiki, dobryja ŭmovy dla prychodu inviestaraŭ. Usie paciarpiełyja ciaham palityčnych represij buduć apraŭdanyja i atrymajuć kampiensacyju», — skazaŭ kiraŭnik NAU Pavieł Łatuška.
«Dla mianie samaje hałoŭnaje — heta biaśpieka. Pavieł Łatuška havaryŭ pra idealnuju Biełaruś, i šmat u kaho moža skłaścisia mierkavańnie, kali my pieramožam, to ŭsiu adrazu stanie pryŭkrasna. Ale ž my razumiejem, što heta nie tak. My pavinny razumieć, što heta doŭhi praces, vielmi šmat raboty», — adreahavała na heta Śviatłana Cichanoŭskaja. Jana zadała pytańnie, ź jakimi hałoŭnymi prablemami my sutykniomsia paśla vybaraŭ?
Błohier Anton Matolka adkazaŭ tak: «Hałoŭnaja prablema — heta sudovaja sistema, adsutnaść u Biełarusi niezaležnych sudoŭ. Kali takaja sistema źjavicca, to astatniaje rašać budzie našmat praściej».
Słuchač z Kalifornii skazaŭ, što hatovy vychodzić na pratesty i pytaŭsia, što rabić, kali ŭłada nie pojdzie na pieramovy. «My budziem imknucca da pieramoŭ, ale idealnaj situacyi dasiahnuć budzie ciažka. Kali ŭłada nie pojdzie na pieramovy, to ŭ hramadstva jość prava na samaabaronu i reahavańnie inšymi zakonnymi mietadami na biasčynstva ŭładaŭ», — adkazaŭ Łatuška.
Niechta «Aleks» prapanavaŭ Śviatłanie Cichanoŭskaj svaje pasłuhi ŭ jakaści mižnarodnaha pamočnika. «U mianie heta atrymajecca lepš, čym u Franka». Potym ludzi zrazumieli, što heta byŭ prankier «Leksus», jaki prosta sprabavaŭ raźvieści prysutnych.
«Damaŭlacca patrebna z usimi, oj, ja pierajšła na biełaruskuju movu, — adkazvała Cichanoŭskaja pra mahčymyja pieramovy z Rasijaj. — My adkrytyja da dyjałohu, kali ŭ nas buduć kantakty z aficyjnaj Rasijaj, to adrazu raskažam».
«Vielmi ciažka pieramahčy bieź pierachodu siłavikoŭ na naš bok», — zaznačyła Cichanoŭskaja, kali havorka pajšła pra reformy MUS. Havaryli taksama pra IT-siektar, pra kulturu. Abmierkavańnie praciahnułasia navat paśla taho, jak z «pakoja» vyjšli ŭsie palityki.
Hladzi jašče: Što za elitarnaja zakrytaja sacsietka ClubHouse, pra jakuju ŭsie havorać
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary