«Pracavali tak, jak patrabavała sumleńnie, a nie instynkt samazachavańnia» Hałoŭny redaktar NN — pra tych, chto varty Nobieleŭskaj premii miru
Jahor Marcinovič padzialiŭsia razvahami, chto ź biełarusaŭ, na jaho dumku, varty Nobieleŭskaj premii miru.
2020 i 2021 hady prademanstravali ŭsiamu śvietu ŭnikalny praces evalucyi nacyi ŭ žyvym efiry. Hałoŭny simvał hetaj źjavy — Śviatłana Cichanoŭskaja, jakaja za hod prajšła šlach ad chatniaj haspadyni da lidara apazicyi. Jaje pieramoha ŭ Nobieli była b pieramohaj miljonaŭ biełarusaŭ, jakija rašylisia kinuć vyklik dyktatury — i šmatdzietnaj maci Volzie Załatar, i 18-hadovaj adčajnaj Sofji Małaševič, i zahinułamu hieroju Vitoldu Ašurku.
Ale jość jašče niekalki čałaviek, jakija taksama apynulisia na pieradavoj. Nie tamu, što zrabili niejki palityčny vybar 2020 hoda, a tamu što prosta praciahnuli svaju samaaddanuju pracu i nie zdradzili ŭłasnym pryncypam. Niezaležnyja biełaruskija ŚMI adpracavali hety hod tak, jak patrabavała sumleńnie, a nie instynkt samazachavańnia. Nasupierak zapałochvańniam i represijam praca išła da apošniaha dnia, pakul isnavała takaja mahčymaść. Samy jarki simvał addanaści — aryštavanaja Maryna Zołatava, pad kiraŭnictvam jakoj kamanda TUT.BY danosiła praŭdzivuju infarmacyju pra padziei Biełarusi.
Samy niabačny front — praca pravaabaroncaŭ i vałancioraŭ. Jany nie zajmalisia palitykaj, jak i žurnalisty, prosta moŭčki ratavali ludziej. Na žal, u ciapierašnich umovach dapamoha taksama ličycca palitykaj. Alesia Bialackaha možna nazvać sumleńniem nacyi, i heta nie budzie lišnim pafasam. Jon nie atrymaŭ svajho Nobiela ŭ 2013-m, kali siadzieŭ u Babrujskaj kałonii. Ciapier jon u SIZA na Vaładarskaha pa takoj samaj absurdnaj kryminalnaj spravie. I ja pierakanany, što paśla vyzvaleńnia Aleś praciahnie adstojvać intaresy tych, kaho niespraviadliva pakryŭdziła biełaruskaja dziaržava, pryčym niavažna, heta budzie ciapierašniaja ci novaja ŭłada.
Pryznańnie ŭniosku hetych ludziej u realizacyi mary biełarusaŭ ab svabodzie budzie čarhovym krokam suśvietnaj salidarnaści z tymi, chto choča žyć u pravavoj jeŭrapiejskaj krainie.
Ciapier čytajuć
Kolki zastavałasia siadzieć departavanym palitviaźniam?8
Kamientary