U Brytanii doktar pravodziŭ apieracyju, vyjšaŭ pazajmaŭsia seksam ź miedsiastroj, viarnuŭsia i ŭsio darabiŭ
44-hadovaha Suchajła Anžuma i miedsiastru zastała ŭ kampramietujučaj pozie šakavanaja kaleha.
Miedycynski trybunał u Brytanii paviedamiŭ, što doktar-aniestezijołah pakinuŭ pacyjenta na 8 chvilin na apieracyjnym stale pad narkozam, a sam pajšoŭ zajmacca seksam ź miedsiastroj u inšaj pałacie. Paśla seksu jon viarnuŭsia i zaviaršyŭ apieracyju, piša Bi-bi-si.
44-hadovaha Suchajła Anžuma i nie nazvanuju pa imieni miedsiastru zastała ŭ «kampramietujučaj pozie» šakavanaja kaleha z balnicy Tejmsajd u Vialikim Mančestery.
Incydent adbyŭsia ŭ vieraśni 2023 hoda. Jon staŭ viadomy padčas słuchańnia spravy ab prafiesijnaj prydatnaści Anžuma, jaki viarnuŭsia ŭ Pakistan, ale padaŭ zajaŭku na adnaŭleńnie pracy ŭ Vialikabrytanii.
Jon nie asprečvaŭ dokazaŭ suprać jaho, pradstaŭlenych Hienieralnaj miedycynskaj radaj (GMC) padčas słuchańnia ŭ Mančestery, i skazaŭ, što jaho pavodziny byli haniebnymi.
Aniestezijołah skazaŭ, što jamu byŭ patrebny «pierapynak na adpačynak», i jon paprasiŭ inšuju kalehu-miedsiastru prasačyć za stanam mužčyny-pacyjenta pasiarod pracedury. Zamiest hetaha Anžum pajšoŭ u inšuju apieracyjnuju ŭ balnicy, dzie zaniaŭsia seksam z žančynaj, jakuju na słuchańni nazyvali miedsiastroj S.
Endru Małoj, pradstaŭnik GMC skazaŭ, što miedsiastra, jakaja zajšła da pary, była «šakavanaja i chutka prajšła praz apieracyjnuju zału da dźviarej».
Suchajł Anžum, jaki adsutničaŭ kala vaśmi chvilin, viarnuŭsia ŭ apieracyjnuju i zaviaršyŭ svaju pracu.
Spadar Małoj dadaŭ: «Možna skazać, što pacyjentu nie była naniesiena škoda z-za adsutnaści doktara Anžuma ŭ apieracyjnaj, i pracedura prajšła biez dalejšych incydentaŭ».
Jon skazaŭ, što miedsiastra, jakaja vyjaviła zakachanych, paviedamiła pra heta svajmu niepasrednamu kiraŭniku.
Da taho, jak sprava była raspačata GMC, Anžum zajaviŭ, što nie asprečvaje faktaŭ spravy i pryznaje, što mieŭ pałavyja znosiny ź miedsiastroj S.
«Patencyjnaja ryzyka»
Doktar skazaŭ, što viedaŭ, što jaho znajomaja miedsiastra «vierahodna budzie pobač», kali jon pakidaŭ svajho pacyjenta.
Suchajł Anžum taksama pryznaŭ, što jaho dziejańni mahli pastavić zdaroŭje pacyjenta pad pahrozu. Anžum paviedamiŭ, što jon choča adnavić svaju karjeru ŭ Vialikabrytanii i paabiacaŭ, što padobnyja pamyłki bolš nie paŭtoracca.
Padčas pakazańniaŭ jon zajaviŭ: «Heta było, miakka kažučy, davoli haniebna. Ja mahu vinavacić tolki samoha siabie».
Suchajł Anžum pryznaŭ, što padvioŭ svaich kaleh i davier Nacyjanalnaj słužby achovy zdaroŭja. Jon dadaŭ: «Ja ščyra prašu prabačeńnia va ŭsich, chto byŭ uciahnuty ŭ hetuju situacyju, i chaču mieć mahčymaść heta vypravić».
Pavodle jaho słoŭ, incydent adbyŭsia paśla «stresavaha pieryjadu» dla jaho siamji, kali jon i jaho žonka nie mahli «naładzić adnosiny jak siamiejnaja para» paśla zaŭčasnaha naradžeńnia dački.
Ciapier čytajuć
Polšča nie adkryje miažu i paśla skančeńnia vučeńniaŭ «Zachad»49
Kamientary