Da źniavolenaha Arcioma Aniščuka, jaki zajaŭlaŭ pra katavańni ŭ kałonii, nie puskajuć naziralnikaŭ hramadskaj kamisii i advakata
Jak paviedamlajuć pravaabaroncy, u kałoniju №15 da źniavolenaha Arcioma Aniščuka — asudžanaha na 2 hady kałonii fihuranta spravy «piaciorki, jakaja paškodziła mašynu žonki načalnika z Departamienta vykanańnia pakarańniaŭ» — nie puścili pradstaŭnikoŭ hramadskaj naziralnaj kamisii. Žonka viaźnia Volha taksama raspaviała, što da Arcioma try tydni nie puskajuć advakata — stolki ž nie było ad jaho listoŭ. Jana rasceńvaje tak: administracyja chavaje Arcioma — i ŭ suviazi z hetym surjozna kłapocicca ab jaho stanie ŭ kałonii №15. Raniej Arciom nieadnarazova raspaviadaŭ advakatu ab katavańniach i źbićci ŭ mahiloŭskaj kałonii.
Jak raspaviała «Viaśnie» žonka Arcioma Volha, apošni list ad muža z kałonii byŭ datavany 9 lipienia. Advakat apošni raz da jaho patrapiŭ 14 lipienia — bolš naviedać Aniščuka jamu nie dali. Taksama načalnik kałonii Alaksiej Łazarenka nie pryniaŭ advakata ŭ pryjomny dzień, bo nibyta jamu kudyści treba było źjechać.
Pa słovach Arcioma, uviečary 13 lipienia jaho pieraviali ŭ atrad. U kamiery jon znachodzicca jašče z tryma ludźmi. Užo ranicaj 14 lipienia na Arcioma Aniščuka «paviesili» parušeńni i adpravili na hutarku z apieratyŭnym supracoŭnikam. Jak skazaŭ Arciom, načalnik kałonii Alaksiej Łazarenka pahražaŭ jamu artykułam 410 Kryminalnaha kodeksa (Dziejańni, što dezarhanizujuć pracu papraŭčaj ustanovy, jakaja vykonvaje pakarańnie ŭ vyhladzie pazbaŭleńnia voli, karajecca pazbaŭleńniem voli na termin ad 2 da 7 hadoŭ).
Taksama Volha adznačaje, što pra śledstva ŭ adnosinach da jaje muža pa kryminalnaj spravie art. 411 Kryminalnaha kodeksa (Złosnaje niepadparadkavańnie patrabavańniam administracyi vypraŭlenčaj ustanovy) ničoha nieviadoma ni joj, ni Arciomu, ni navat advakatu.
«Ja chvalujusia za stan Arcioma, što ź im adbyvajecca. Moža jon zachvareŭ, moža jaho źbili…» — kaža Volha.
Pa infarmacyi MAYDAY, upraŭleńnie Departamienta vykanańnia pakarańniaŭ pa Mahiloŭskaj vobłaści admoviła pradstaŭnikam Mahiloŭskaj abłasnoj HNK u naviedvańni PK-15. Tam naziralniki płanavali sustrecca z Arciomam Aniščukom. Aficyjna pryčynaj admovy stała «niebiaśpieka raspaŭsiudžvańnia karanavirusnaj infiekcyi».
Volha Aniščuk padała zajavu ŭ HNK dla vizitu naziralnikaŭ u kałoniju dla pravierki infarmacyi ab katavańniach, ale im, jak užo zhadvałasia vyšej, admovili.
Raniej Volha paviedamlała, što ŭ PK-15 užyvajuć hvałt u dačynieńni da jaje muža. Kab vyratavacca ad katavańniaŭ, Arciom prahłynuŭ mietaličnyja pradmiety. Paźniej źjaviłasia infarmacyja, što paśla rezanansu historyi ŭ ŚMI i prakurorskaj pravierki, Arcioma źbiŭ načalnik kałonii.
Nahadajem, na Arcioma Aniščuka ŭ mahiloŭskaj kałonii zaviali novuju kryminalnuju spravu pa artykule 411 Kryminalnaha kodeksa (Złosnaje niepadparadkavańnie patrabavańniam administracyi vypraŭlenčaj ustanovy). Pryčyna novaj «kryminałki» — Arciom nibyta parušyŭ režym: dvojčy admoviŭsia prybiracca.
Tolki žminda i lanivy nie padtrymlivaje «Nivy»! Vy možacie za chvilinu padtrymać «NN» padachodnym, nie patraciŭšy ni kapiejki svaich5
Kamientary