U ES usio čaściej abmiarkoŭvajucca mahčymaści vytvorčaści vadarodu dla pierachodu da «zialonaj» enierhietyki. Na inviestycyi moža raźličvać i Ukraina.
Ukrainskaja hazatranspartnaja sistema moža apynucca ŭ kryzisie, bo ZŠA i Hiermanija damovilisia ab zaviaršeńni budaŭnictva «Paŭnočnaha patoku — 2», što dazvolić Rasii abychodzicca biez tranzitu hazu praz Ukrainu. Termin kantrakta pamiž Maskvoj i Kijevam skončycca ŭ 2024 hodzie. Adnak dziakujučy refarmavańniu enierhietyčnaha siektara ŭ ES dla Ukrainy adkryvajucca novyja mahčymaści.
U 2020 hodzie ES prezientavaŭ vadarodnuju stratehiju, nakiravanuju na šyrokaje vykarystańnie «zialonaha» vadarodu. Kab być «zialonym», vadarod musić vyrablacca za košt adnaŭlalnych krynic enierhii. Ahułam jeŭrapiejcy płanujuć inviestavać u hetu halinu ad 180 da 479 miljardaŭ jeŭra da 2050 hoda. Heta moža dapamahčy jeŭrapiejskim krainam dasiahnuć klimatyčnaj niejtralnaści — kali vykidy parnikovych hazaŭ u atmaśfieru nie pieravyšajuć abjomu, što pahłynaje ekasistema.
Adzin z klučavych partnioraŭ hetych płanaŭ ES — Ukrajina. Jeŭropa raźličvaje, što va Ukrainie da 2030 hoda pabudujuć da 10 hihavat mahutnaściaŭ dla vytvorčaści «zialonaha» vadarodu, piša Deutsche Welle.
Letaś Hiermanija i Ukrajina padpisali pahadnieńnie ab enierhietyčnym partniorstvie, adnym z elemientaŭ jakoha źjaŭlajecca raźvićcio vadarodnaj enierhietyki. Heta značyć, što Ukrajina moža atrymać častku z 2,8 miljarda inviestycyj, jakija Hiermanija płanuje vyłučać na vadarodnyja prajekty za miažoj.
Takaja zacikaŭlenaść va Ukrainie tłumačycca najaŭnaściu hazatranspartnaj sistemy, jakuju možna vykarystoŭvać dla transparciroŭki vadarodu. Adnak dla taho, kab zamianić haz na vadarod spatrebiacca niemałyja srodki, bo vadarod vyklikaje chutkuju karoziju mietału. Tamu truby nieabchodna abšyvać znutry kievłaram, što budzie kaštavać miljardy dalaraŭ.
Pa słovach ekśpiertaŭ, transparciroŭku vadarodu možna ździajśniać i bieź pieraabstalavańnia, kali pieramiašać vadarod z hazam. Daśledavańni pakazvajuć, što takim čynam možna transpartavać da 20 adsotkaŭ vadarodu. Adnak dla hetaha varyjanta patrabujecca bolš daśledavańniaŭ i sinchranizacyja stratehij krain ES.
Ź inšaha boku, užo ciapier niekatoryja kampanii naładžvajuć vytvorčaść «zialonaha» vadarodu va Ukrainie. Naprykład, stvoranaja ŭ červieni 2020 kampanija «Vadarod Ukrainy». Mahčymaść raźvivać vytvorčaść «zialonaha» vadarodu razhladaje taksama kampanija DTEK.
Kamientary