Vyniki pieramoŭ u Maskvie: ceny na haz nie mianiajucca, Biełaruś atrymaje $630-640 miljonaŭ, a nie $3 miljardy
Paśla pieramoŭ Pucina i Łukašenki, jakija doŭžylisia 3,5 hadziny, prezident Rasii zajaviŭ, što ŭzhodnienyja ŭsie 28 prahram pa Sajuznaj dziaržavie. 10 vieraśnia prahramy pavinny ŭchvalić na pasiadžeńni ŭ Minsku. A da kanca hoda baki zrobiać heta na pasiadžeńni Vyšejšaha dziaržsavieta.
«Havorka idzie pra 28 tak zvanych sajuznych prahramach, jakija nacelenyja na ŭnifikacyju zakanadaŭstva Rasii i Biełarusi ŭ roznych halinach ekanomiki, na vyraŭnoŭvańnie ŭmoŭ dziejnaści haspadarčych subjektaŭ dźviuch krain, pabudovu adzinych finansavych i enierhietyčnych rynkaŭ, transpartnaj prastory, farmavańnie i realizacyju ahulnaj pramysłovaj i sielskahaspadarčaj palityki. I siońnia chacieŭ by z zadavalnieńniem adznačyć, što ŭzhodnienyja ŭsie 28 prahram», — skazaŭ Pucin.
Jakija rašeńni dasiahnutyja pamiž dziaržavami na dadzieny momant? Pra što skazali na pres-kanfierencyi?
Pra padatki i pošliny
Pucin adznačyŭ, što hetyja prahramy naceleny na vyraŭnoŭvańnie ŭmoŭ dziejnaści haspadarčych subjektaŭ dźviuch krain.
Paśla jon dadaŭ, što šerah prahram nakiravany na harmanizacyju padatkovaha i mytnaha zakanadaŭstva. U pryvatnaści praduhledžvajecca padpisańnie damovy ab ahulnych pryncypach zboru ŭskosnych padatkaŭ. Nahadajem, što asnoŭnyja ŭskosnyja padatki — heta akcyzy i padatak na dadatkovy košt.
Pucin adznačyŭ, što Biełaruś i Rasija płanujuć uvieści intehravanuju sistemu administravańnia ŭskosnych padatkaŭ. Paprostu kažučy, sistemu štrafaŭ i pakarańniaŭ.
«Meta — kab była bačna struktura cany tavaru», — adznačyŭ jon.
Pra kredyt dla Biełarusi
Stała viadoma, što Rasija da kanca 2022 hoda akaža Biełarusi kredytnuju padtrymku ŭ abjomie 630—640 młn dalaraŭ. I Łukašenka zajaviŭ, što Biełaruś pakul nie źbirajecca źviartacca pa novyja rasijskija kredyty.
Raniej krynicy RBK paviedamlali, što Biełaruś płanavała abmierkavać vydaču kredytu ŭ pamiery da 3 miljardaŭ dalaraŭ.
Pra adzinuju valutu
I Pucin, i Łukašenka ŭ adzin hołas havorać, što adzinaj valuty nie budzie, ale Biełaruś i Rasiju čakaje adzinaja hrašova-kredytnaja palityka: valutnaje rehulavańnie, intehracyja nacyjanalnych płaciežnych sistem i stvareńnie ahulnaj płaciežnaj prastory.
«Usio heta dapamoža zabiaśpiečyć dobrasumlennuju kankurencyju i naraścić dziełavuju aktyŭnaść na finansavym rynku, a taksama efiektyŭna reahavać na ryzyki admyvańnia hrošaj i finansavańnia złačynnaj dziejnaści, uklučajučy teraryzm», — adznačyŭ Pucin.
Pra ceny na enierhanośbity
Pucin anansavaŭ padpisańnie dakumientaŭ ab stvareńni adzinych enierhietyčnych rynkaŭ RF i Biełarusi. Taksama adznačyŭ, što cana na enierhanośbity ŭ 2022 hodzie dla Biełarusi zachavajucca na ŭzroŭni 2021 hoda.
Pry hetym da 1 śniežnia 2023 hoda krainy padpišuć dakumient pa stvareńni abjadnanaha rynku hazu.
Taksama na sustrečy prahučała, što ŭ Biełarusi i Rasii budzie adziny rynak naftapraduktaŭ i elektraenierhii.
Pra ahulnuju abaronnuju prastoru
Pucin taksama zajaviŭ, što abmierkavaŭ z Łukašenkam farmiravańnie adzinaj abaronnaj prastory RF i Biełarusi i zabieśpiačeńnie biaśpieki.
Pra sacyjalnuju palityku
Pucin taksama adznačyŭ, što Biełaruś i Rasija vypracuje adzinyja padychody da pracoŭnych adnosin, rynku pracy, zaniataści nasielnictva, sacyjalnaha strachavańnia i piensijnaha zabieśpiačeńnia, a taksama padtrymki siemjaŭ ź dziećmi.
Kamientary