Ambicyjny prajekt Džefa Biezasa: kaśmičnaja stancyja dla turystaŭ. Jana budzie paraŭnalnaja z MKS
Abjekt moža pryniać pieršych turystaŭ jašče da kanca dziesiacihodździa.
Kampanija Blue Origin, što naležyć amierykanskamu miljarderu Džefu Biezasu, źbirajecca pabudavać na arbicie Ziamli vialikuju kaśmičnuju stancyju pad nazvaj Orbital Reef.
Abjekt možna budzie vykarystoŭvać dla praviadzieńnia navukovych ekśpierymientaŭ i kaśmičnaha turyzmu, a taksama, mahčyma, navat dla kaśmičnaj vytvorčaści.
Orbital Reef zmoža pryniać da 10 čałaviek i budzie mieć prykładna taki ž unutrany abjom, što i MKS.
Płanujecca, što razam z Blue Origin nad prajektam buduć pracavać kampanii Sierra Space i Boeing, ale pakul niama harantyj, što płany Biezasa buduć realizavanyja. Takija prajekty pakul što zanadta darahija i ryzykoŭnyja, tłumačyć CNN.
Vierahodna, što košt stancyi składzie dziasiatki miljardaŭ dalaraŭ, a jaje padrychtoŭka da ekspłuatacyi budzie ŭklučać šmatlikija testavyja paloty ŭ metach biaśpieki. Finansavać stvareńnie stancyi buduć Blue Origin i Sierra Space. Taksama pradstaŭniki kampanij abviaścili na pres-kanfierencyi, što chacieli b bačyć NASA asnoŭnym arandataram novaj stancyi, ale pakul niezrazumieła, jak moža adbyvacca partniorstva.
Blue Origin spadziajecca, što stancyja pačnie pracavać da kanca 2020-ch hadoŭ. Adnak treba šmat zrabić, kab ździejśnić ambicyjny prajekt. Dahetul kampanija Džefa Biezasa zdoleła tolki ździejśnić niekalki piłatavanych subarbitalnych palotaŭ — takija ž vyniki NASA pakazvała jašče ŭ pačatku 1960-ch. Blue Origin jašče treba navučycca dastaŭlać na arbitu kaśmičnyja karabli, nie kažučy pra toje, kab pravodzić piłatavanyja paloty.
Chutka zakančvajecca termin pracy Mižnarodnaj kaśmičnaj stancyi. Tamu NASA duža zacikaŭlena ŭ budaŭnictvie pryvatnych abjektaŭ takoha typu. Akramia Blue Origin, z padobnaj prapanovaj vystupili inšyja amierykanskija kampanii, naprykład, techasskija Nanoracks i Axiom.
Pieršy jeŭrapiejski kasmadrom pabudujuć u Šviecyi
U ZŠA stvarajuć kvartał z 100 damoŭ, vyrablenych na trochmiernym pryntary
Ciapier čytajuć
U Sule adznačyli Kupalle. Haściej było stolki, što na darohach utvarylisia zatory5
Kamientary