Ministr infarmacyi prapanavaŭ pazbaŭlać prava vybara biełarusaŭ, što majuć vid na žycharstva inšych krain
U efiry telekanała «Biełaruś 1» ministr infarmacyi Uładzimir Piarcoŭ vykazaŭsia za toje, kab abmiažoŭvać pravy biełarusaŭ, što majuć vidy na žycharstva, karty palaka i navat pašparty inšych krain.
Nahadajem, niadaŭna deputat Ihar Chłabukin, jaki ŭ minułym byŭ śpiecyjalistam pa pažarnaj biaśpiecy, ličyć, što kartu palaka zakanadaŭča treba pryraŭniać da druhoha pašparta.
Ministr infarmacyi Uładzimir Piarcoŭ pajšoŭ dalej, jon prapanavaŭ pazbaŭlać prava hałasavać i tych, chto maje kartu palaka, i biełarusaŭ ź vidam na žycharstva, i tych, chto maje dadatkovaje hramadzianstva inšaj krainy.
«Ludzi, što vałodajuć vidami na žycharstva, kartami palaka, pašpartami inšych dziaržaŭ, pavinny być abmiežavanyja ŭ pravach na terytoryi Biełarusi, — zajaviŭ jon. — Mienavita toj, chto pražyvaje bolš, čym paŭhoda ŭ inšaj krainie i źjaŭlajecca padatkovym rezidentam inšaj krainy, tam buduje niejkaje hramadstva, tudy płacić padatki, atajasamlivaje svajo asnoŭnaje žyćcio i žyćciadziejnaś z toj krainaj, tut pa krajniaj miery nie moža hałasavać, być vybranym, bo jon zaležyć ad inšaj dziaržavy», — vykazaŭ svajo mierkavańnie Uładzimir Piarcoŭ.
Adznačym taksama, što Rasija nie pieršy hod zajaŭlaje, što choča stvaryć svoj anałah — kartku ruskaha, jakuju źbirajucca vydavać byłym suajčyńnikam pa SSSR. Takaja kartka budzie davać šerah pryvilejaŭ — ad biaspłatnaha navučańnia ŭ VNU da lhot na prajezd u hramadskim transparcie.
Rasijskija palityki ličać, heta budzie spryjać abjadnańniu ruskich, jakija apynulisia za miažoj paśla raspadu SSSR, — ideja, suhučnaja z palitykaj Polščy. Biełaruskija palityki ideju kaleh z Rasii nie krytykujuć.
Pry hetym u Biełarusi pražyvaje amal 707 tysiač hramadzian, jakija ličać siabie ruskimi, palakaŭ, dla paraŭnańnia, amal 288 tysiač.
Kamientary