«Zdradnikam daravać nielha». Łukašenka znoŭ vykazaŭsia pra rabotu niekamiercyjnych arhanizacyj
Alaksandr Łukašenka siońnia na naradzie ab supraćdziejańni sankcyjam, znoŭ vykazaŭsia ab pracy ŭ krainie niekamiercyjnych arhanizacyj i fondaŭ, piša BiełTA.
«Jašče raz paŭtaraju: zdradnikam daravać nielha. Tym, chto sprabavaŭ pierakulić krainu i zdać jaje «tudy», nijakaha prabačeńnia nie budzie. My ich bačym i vyjaŭlajem dziasiatkami, a to i sotniami, — zajaviŭ Alaksandr Łukašenka. — Tyja arhanizacyi, jakija finansavalisia z-za miažy i arhanizoŭvali pieravarot i miaciež, my ŭsie likvidavali. Jak by ni było ciažka, my ž viedali, jakija buduć nastupstvy. I jany siońnia zavyli: «Adnavicie nazad!» Jany nikoli nie buduć adnoŭlenyja».
U toj ža čas jon padkreśliŭ: «Lubyja fondy, lubyja arhanizacyi mohuć u nas isnavać, ale zajmacca kankretnaj spravaj na karyść Radzimy. Chaj abaraniajuć chvorych, lečać kavid, chaj čarnobylcam dapamahajuć, žabrakam, biazdolnym, ludziam z abmiežavanymi mahčymaściami, lečać dzietak i hetak dalej — kali łaska, daroha adkrytaja. Chtości choča stvaryć fondy — kali łaska».
Łukašenka taksama vykazaŭsia nakont alternatyŭnych punktaŭ hledžańnia.
«Kožny pavinien mieć svoj punkt hledžańnia, vy i majecie. Ja heta usprymaju jak dadzienaść. Ale, darahija maje, usie my, jakija siadziać tut za hetym stałom, i kiraŭniki, pra jakija ja skazaŭ, abmiežavanyja peŭnymi ramkami — ramkami kiraŭnika. Kali ty chočaš być absalutna niezaležnym i zaklikać da sankcyj, vajavać suprać ułady i inšaje — vuń jany ŭ Litvie, Polščy siadziać, tam jašče jość vakansii. Adtul usio bolš i bolš chočuć nazad viarnucca. Kali łaska, na tyja vakansii jedźcie i tam zaklikajcie da sankcyj. Viedajecie, što my tam vas nie dastaniem, i šeść ci vosiem hadoŭ pa novym zakonie vy nie atrymajecie».
«Tamu ŭsich hetych padpisantaŭ (za alternatyŭnych kandydataŭ na prezidenckich vybarach) my pavinny bačyć, asabliva kali jany pracujuć dzieści «naviersie», u viertykali ŭłady. Ale siońnia ich tam łavić i dapytvać, pytacca ź ich — navošta? Niaŭžo niama čym zajmacca? Tym bolš mnohija ŭžo ŭ treci raz pieraabulisia. Ale tych, chto parušaŭ zakon, šturchaŭ ludziej na parušeńnie zakona (u nas ich taksama niamała), voś z hetymi my pavinny razabracca. Ale rabić heta treba akuratna, aściarožna, nie pavinna być kampaniejščyny, bo my znoŭ pieratvorymsia ad zvarotnaha ŭ niejkich varvaraŭ. I palaciać niavinnyja hałovy. Tamu nielha dapuścić skažeńni, nielha kidacca».
«Ludziej prymušali dumać, što ničoha nikoli nie źmienicca». Chto taki antykamunist Łasła Krasnaharkai, jaki atrymaŭ Nobieleŭskuju premiju pa litaratury?99
Kamientary