Zialenski anansavaŭ sustreču patencyjnych harantaŭ biaśpieki Ukrainy
U ich liku prezident nazvaŭ ZŠA, Vialikabrytaniju, Turcyju, Polšču, Niamieččynu, Francyju i Izrail. Rasija nie budzie ŭdzielničać u sustrečy. Ca słoŭ Zialenskaha, spačatku nieabchodna dasiahnuć «abjadnanaha razumieńnia harantyj biaśpieki».
Sustreča krain — harantaŭ biaśpieki Ukrainy adbudziecca, šerah dziaržaŭ užo vykazali hatoŭnaść abmiarkoŭvać hetaje pytańnie, paviedamiŭ u intervju Haberturk prezident Ukrainy Uładzimir Zialenski.
«Hetaja sustreča dakładna budzie, bo jaje paćvierdzili pradstaŭniki dziaržaŭ — harantaŭ budučych, heta tyčycca Złučanych Štataŭ, Vialikabrytanii, Turcyi, Polščy, Niamieččyny, Francyi, Izraila», — skazaŭ jon. Zialenski padkreśliŭ, što heta nie ŭvieś śpis, a tolki tyja krainy, «jakija ŭžo hatovyja pryjazdžać i abmiarkoŭvać śpis harantyj biaśpieki».
Pa słovach prezidenta, jość krainy, jakija sami zacikaŭlenyja ŭ statusie haranta biaśpieki Ukrainy, i jość dziaržavy, jakija ŭ takoj jakaści razhladaje ŭkrainskaje kiraŭnictva. Zialenski adznačyŭ, što dla Kijeva važna razumieć, «jakija z hetych krain hatovyja na jakija harantyi»: niekatoryja ź ich hatovyja na poŭnuju padtrymku, niekatoryja — nie.
Mierkavanaja sustreča projdzie biez udziełu Rasii.
«Sustreča z hetymi harantami albo z pradstaŭnikami hetych lidaraŭ, potym — abjadnanaje razumieńnie harantyj biaśpieki, a potym užo razmovy z rasijskim bokam, — apisaŭ svajo ŭjaŭleńnie ab pieramovach ukrainski prezident. — <…> Kali my ŭbačym, što nas usio zadavalniaje, što my budziem adčuvać biaśpieku ŭ budučyni, nie tak, jak było z Budapiešckim miemarandumam i inšymi dakumientami, jakija my mieli ŭ minułym, ale jakija nie spracavali, paśla hetaha my praviadziom sustreču z Rasijaj».
Kamientary