Rasijskija vajskoŭcy masava jeździać pa Biełarusi na skradzienych va Ukrainie aŭto
U krasaviku ŭ Homielskaj vobłaści nieadnarazova zaŭvažali hramadzianskija aŭtamabili biez numarnych znakaŭ i z namalavanymi litarami «V». «Naša Niva» raźbirałasia, kamu mohuć naležać hetyja mašyny i adkul jany ŭzialisia na našych darohach.
Jašče da pačatku vajny va Ukrainie na terytoryi Biełarusi było šmat rasijskaj vaskovaj techniki, jakaja, jak śćviardžali tady, pryjechała na vučeńni. Siarod traspartnych srodkaŭ sustrakalisia lehkavyja aŭto, džypy i mikraaŭtobusy, jakija naležali rasijskim siłavym struktaram. Jany čaściej za ŭsio byli z numarami, a sam aŭtapark składaŭsia z UAZikaŭi dy «Hazelaŭ».
Adnak paśla adstupleńnia rasijskaj armii na Kijeŭskim i Čarnihaŭskim kirunkach na darohach Biełarusi pačali źjaŭlacca hramadzianskija aŭtamabili biez numarnych znakaŭ, z roznych bakoŭ paznačanyja łacinskaj litaraj «V». Nijakich inšych paznak, jakija mahli b śviedčyć ab tym, što hety transpart naležyć armii RF, niama. Raniej aŭtamabilaŭ takich marak i madelaŭ (KIA, Honda, BMW) u aŭtaparku rasijskaj armii było nie vidać.
Mašyny biez numarnych znakaŭ ruchalisia jak u kałonach u supravadžeńni biełaruskich «orhanaŭ» (padobna da transpartu MNS), tak i asobna.
Kali ŭvažliva pryhledziecca da techniki, jakaja ruchałasia ŭ kałonie pad supravadžeńniem, to možna zaŭvažyć niekalki hruzavikoŭ, brendavanych rekłamaj na ŭkrainskaj movie. U pryvatnaści, u kałonie byli hruzaviki z nadpisami «Havrilivśki kurčata».
Taksama byli zaŭvažanyja Kia Sportage, VW Crafter, Peugeot Partner i inšyja aŭtamabili biez numarnych znakaŭ. Na videa, jakoje było raźmieščanaje ŭ telehram-kanale Antona Matolki, bačna, što kałonu supravadžajuć aŭtamabili, abstalavanyja śpiecsihnałami.
Aŭtamabili ź litaraj «V» byli zaŭvažanyja i padčas ruchu biez arhanizavanaj kałony. Usie jany byli biez numaroŭ. Adznačym, što, zhodna z praviłami darožnaha ruchu Biełarusi, zabaraniajecca ŭdzieł u im transpartnaha srodku biez ustalavanych u praduhledžanych miescach rehistracyjnych znakaŭ. Parušalnikaŭ čakaje štraf u pamiery ad 10 da 20 bazavych.
Niahledziačy na heta, rasijskija vajskoŭcy i raniej nie prytrymlivalisia PDR. Foty rasijskaha UAZ Patriot biez numaroŭ nam dasyłali jašče ŭ sakaviku.
«Naša Niva» vieryfikavała miesca, dzie znachodziŭsia adzin z takich aŭtamabilaŭ. Pazadarožnik BMW (na zdymku nižej) na niejki čas pakinuli na parkoŭcy la žyłoha doma na adnoj z vulic Homiela.
Infarmacyja ab tym, što rasijskija vajskoŭcy kraduć aŭtamabili, nieadnarazova źjaŭlałasia ŭ šerahu ŭkrainskich ŚMI. Sałdaty zabirali jak novyja aŭtamabili z sałonaŭ, jakija znachodzilisia na časova padkantrolnaj RF terytoryii, tak i ŭžyvanyja. Naprykład, 22 sakavika, kiraŭnik Sumskaj abłasnoj vajennaj administracyi raspaviadaŭ, što na terytoryi vobłaści byli vypadki niezakonnaha zavałodańnia transpartnymi srodkami ŭkraincaŭ. Kradzienyja aŭtamabili vykarystoŭvali ŭ tym liku dyviersijna-raźviedvalnyja hrupy. Adnak, jak bačna, častka «trafiejnych» mašyn u vyniku apynułasia na terytoryi Biełarusi.
Aproč vidavočnych parušeńniaŭ PDR, uźnikajuć inšyja jurydyčnyja pytańni. Na padstavie jakich dakumientaŭ hety transpart trapiŭ u Biełaruś? Chto ŭ takim vypadku ŭvohule kantraluje situacyju na ŭkrainska-biełaruskaj miažy? Jakim čynam budzie adbyvacca lehalizacyja transpartu, jaki nie prajšoŭ mytnuju ačystku? Ci jość harantyja, što z časam hetyja aŭto nie trapiać u prodaž u Biełarusi i prosty čałaviek nie stanie ŭłaśnikam mašyny, jakaja znachodzicca ŭ vyšuku?
Taksama zastajecca niezrazumiełym, chto budzie vypłačvać kampiensacyju paciarpiełym, kali raptam takoje aŭto trapić u DTZ, jak biełaruskija daišniki zmohuć znajści parušalnika, kali aŭtamabil ruchajecca biez numarnych znakaŭ?
Čytajcie taksama:
Kolki zapłacili za pierasyłku rečaŭ rasijskija sałdaty-maradziory?
Pahladzicie, u jakich umovach va Ukrainie prachodzić pasiaŭnaja FOTY
Babaryka pra siabie ŭ 2020-m: Heta nie naiŭnaść. Nie dumaju, što takoha kryvažernaha scenara niechta čakaŭ79
Kamientary