Va Uzbrojenych Siłach Biełarusi pačałasia raptoŭnaja pravierka bojehatoŭnaści. Na darohach źjaviacca kałony
U Biełarusi pačałasia raptoŭnaja pravierka sił reahavańnia, padčas jakoj voinskim častkam i padraździaleńniam treba budzie adpracavać pytańni pryviadzieńnia ŭ bajavuju hatoŭnaść i inšyja vučebna-bajavyja zadačy, zajavili ŭ Ministerstvie abarony Biełarusi.
U viedamstvie adznačyli, što pravierka nie niasie niebiaśpieki mižnarodnaj supolnaści. Jaje meta, pa infarmacyi Minabarony RB, — acanić zdolnaść asabovaha składu da apieratyŭnaha reahavańnia ŭ kryzisnych situacyjach.
Vojski buduć dziejničać na nieznajomych učastkach miascovaści va ŭmovach chutkaha źmianieńnia stanovišča.
Skład sił, jakija pryciahvajucca da pravierki, budzie paetapna naroščvacca, što «dazvolić pravieryć ich zdolnaść procidziejničać vajennym pahrozam jak na ziamli, tak i ŭ pavietry».
Pravierka nosić kompleksny charaktar. Padčas jaje zapłanavany ruch značnaj kolkaści vajennaj techniki, što moža abciažaryć ruch pa darohach ahulnaha karystańnia. Minabarony paprasiła žycharoŭ nasielenych punktaŭ i vadzicielaŭ transpartnych srodkaŭ być pilnymi na darohach.
Minułyja maštabnyja vučeńni «Sajuznaja rašučaść — 2022» — sumiesnyja z Uzbrojenymi siłami Rasijskaj Fiederacyi — prachodzili z 10 pa 20 lutaha 2022 hoda. Praz čatyry dni rasijskaja armija z terytoryi Biełarusi ŭvarvałasia va Ukrainu.
Biełaruskaja armija tady ŭ napadzie niepasredna nie ŭdzielničała, abmiežavałasia vykanańniem tyłavych funkcyj. Maskva raźličvała zachapić krainu i likvidavać ukrainskuju dziaržaŭnaść za niekalki dzion. Adnak rasijskija vojski byli adkinutyja ad Kijeva i Charkava i spynienyja pad Mikałajevam i Adesaj.
Ab praviercy bojehatoŭnaści było abvieščana siońnia, a ŭčora adbyłasia telefonnaja razmova Uładzimira Pucina i Alaksandra Łukašenki. Pravierka adbyvajecca na fonie intensifikacyi rasijskich bambiožak Ukrainy i sproby prarvać ukrainski front u rajonach Iziuma, Limana, Hulajpola. Akramia taho, zachodnija raźviedki havorać pra namier Rasii pačać bajavyja dziejańni z terytoryi Prydniastroŭja.
Ciapier čytajuć
«Siadzieŭ užo 50 sutak, zatrymali jaho dziaŭčynu i brata». Sukamiernik raskazaŭ pra radyjoamatara, aryštavanaha za zdradu dziaržavie3
Kamientary