U Breście adbyŭsia samy chutki sud nad «karahodnikami». Los dvaich abvinavačanych vyrašyli mienš čym za hadzinu
17 maja sud u Breście razhledzieŭ spravu čarhovych fihurantaŭ «karahodnaj spravy». Na łavie padsudnych byli Andrej Ułasaŭ i Julija Suvałka. Abodvuch abvinavačvali pa č. 1 art. 342 «Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich». Sudovaje pasiadžeńnie ŭznačaliŭ kamandziravany z Žabinki sudździa Viktar Novik, paviedamlaje «Viasna».
«Karahodnikami» nazyvajuć udzielnikaŭ Marša hierojaŭ, jaki adbyŭsia ŭ Breście 13 vieraśnia 2020 hoda. Padčas hetaha marša prysutnyja słuchali muzyku, śpiavali pieśni, tančyli, śmiajalisia. Usiaho na tym maršy było bolš za tysiaču čałaviek. Vyhladała ŭsie jak fiestyval. Praź niekatory čas siłaviki pačali ahresiŭna razhaniać prysutnych i palivać ich z vadamiota. Heta adbyłosia kala 17 hadzin na skryžavańni praśpiekta Mašerava i bulvara Kasmanaŭtaŭ.
Zhodna ź viersijaj abvinavačvańnia, Andrej Ułasaŭ i Julija Suvałka ŭ hrupie ź inšymi asobami naŭmysna «uziali aktyŭny ŭdzieł u hrupavych dziejańniach, jakija hruba parušajuć hramadski paradak». Nibyta ich dziejańni byli spałučanyja ź niepadparadkavańniem zakonnym patrabavańniam pradstaŭnikoŭ ułady, paciahnuli za saboj parušeńnie pracy transpartu, arhanizacyj i pradpryjemstvaŭ.
Akurat takuju ž farmuloŭku abvinavačvańnia prymianiajuć i ŭ dačynieńni da inšych fihurantaŭ «karahodnaj spravy». To-bok, Andrej i Julija vyklučeńniem nie stali. Tym nie mienš, asablivaść u hetaha suda była. Heta byŭ samy chutki sud nad fihurantami «karahodnaj spravy», jaki skončyŭsia mienš čym praz hadzinu.
Padčas sprečak prakurorka Alena Cichanovič prasiła sud pryznać Andreja Ułasava i Juliju Suvałku vinavatymi ŭ ździajśnieńni złačynstva pavodle č. 1 art.342 i pryznačyć kožnamu pa 3 hady «chatniaj chimii» — abmiežavańnia voli biez nakiravańnia ŭ papraŭčuju ŭstanovu adkrytaha typu. Sudździa Viktar Novik doŭha nie dumaŭ, i mienavita takoje pakarańnie i pryznačyŭ.
Na siońniašni dzień prysudy pa «karahodnaj spravie» u Biełarusi vynieśli 129 čałaviekam.
Kamientary