Pra śmierć 22-hadovaj Karaliny Ramančuk stała viadoma 28 maja. Jana z kalehami znachodziłasia ŭ haścinicy Viciebskaha centralnaha spartyŭnaha kompleksu. Tam joj niečakana stała drenna, dziaŭčyna pamierła da pryjezdu chutkaj. Siońnia daktary vyznačyli pryčynu śmierci Karaliny.
— U jaje insult, — koratka skazaŭ dyrektar futbolnaha kłuba «Viciebsk» Mikałaj Vajciuchoŭski i pakłaŭ słuchaŭku.
Padobnyja na insult simptomy Karaliny apisvaje i kaleha futbalistki pa kamandzie. Pavodle jaje słoŭ, u toj viečar dziaŭčyna pačała ciažka dychać, u jaje niamieli ruki, a paśla jana straciła prytomnaść, piša Zerkalo.io.
— Zanadta maładaja, ničoha nie tryvožyła, a tut takaja chutkaja śmierć, — kaža futbalistka. — Dziaŭčynka była žyćciaradasnaja, aktyŭnaja, ja b navat skazała, samaja ciahavitaja i poŭnaja enierhii ŭ kamandzie… Dušeŭny i ščyry čałaviečak, ź jakim zaŭsiody možna było pahavaryć na lubyja temy. Byvała, što na dušy drenna, a jana svajoj enierhietykaj i ŭśmieškaj padymie nastroj za chvilinu.
Raniej paviedamlałasia, što dyrektar «Viciebska» Mikałaj Vajciuchoŭski «navat nie staŭ pytać mierkavańnie žanočaj kamandy i zahadaŭ jechać na niadzielnuju hulniu».
Kaleha Karaliny abviarhaje hetuju infarmacyju: pa jaje słovach, dziaŭčaty sami vyrašyli zhulać u pamiać ab zahinułaj siabroŭcy.
— U dziaŭčat byŭ vybar: jany mahli nie jechać, ale dziela Karaliny vyjšli, — kaža futbalistka (jana ŭ toj dzień udzieł u hulni nie prymała). — Ale dziaŭčaty — małajcy, niahledziačy ni na što, vybrali ŭčora pajechać i zhulać dziela jaje. Dy jašče i zmahli pieramahčy.
Siońnia ŭ Viciebsku prajšło raźvitańnie z Karalinaj. Pachavajuć dziaŭčynu zaŭtra ŭ Racičach Hrodzienskaha rajona.
***
Karalina Ramančuk naradziłasia 13 lutaha 2000 hoda. Udzielničała ŭ futbolnym čempijanacie Biełarusi, z 2017 pa 2020 hady hulała za «Nioman». Z 2021 hoda dziaŭčyna vystupała za futbolny kłub «Viciebsk».
Karalina straciła baćkoŭ — u jaje była tolki siastra Bažena i ciotka. Žurnalisty źviazalisia z Baženaj. Taja pakul u šoku.
— Jana była samym lepšym čałaviekam na ziamli i vydatnaj siastroj. Za što nam heta ŭsio, ja nie viedaju. I da hetaha času nie vieru, što jaje bolš niama… — tolki i zmahła skazać jana.
Ciapier čytajuć
«Razahnać darmajedaŭ! Addać ludziam ziamlu!» Traktaryst z Chojnikaŭ, jaki ciapier žyvie ŭ Łatvii, paraŭnaŭ sielskuju haspadarku tam i ŭ nas13
Kamientary