Partyzany z Chiersona raspaviali, jak zmahalisia z rasijskaj uładaj
Niekalki ŭdzielnikaŭ ukrainskaha padpolla ŭ Chiersonie raspaviali, jak stali partyzanami, jakija zadańni vykonvali, i čamu rasijskija vajskoŭcy nie mahli atrymać nijakaj kaštoŭnaj infarmacyi navat paśla taho, jak łavili partyzan. Heta adzin z redkich vypadkaŭ, kali častka hierojaŭ publikacyi mieła znosiny z žurnalistami nie ananimna: nie nazyvajučy ich proźviščy, vydańnie pakazvaje tvary, piša «Ahientstvo. Novosti» sa spasyłkaj na The Washington Post.
Adzin z surazmoŭcaŭ vydańnia nazvaŭsia Iharam. Pavodle jaho słoŭ, jon navat nie viedaŭ viarboŭščyka pa imieni. Toj tolki skazaŭ, što słužyć u siłach śpiecyjalnych apieracyj Ukrainy (uvachodziać va USU), i spytaŭ, ci choča Ihar dapamahčy zmahacca z ruskimi. «Zapišycie mianie», — adkazaŭ Ihar.
Kaardynatar z pazyŭnym «Dym» prasiŭ Ihara pieradać hieałakacyju raźmiaščeńnia rasijskich vajskoŭcaŭ i ich składoŭ zbroi, pierachavać schovanki sa zbrojaj i vybuchoŭkaj. «Dym» kazaŭ, što Ihar pavinien być hatovy pryniać udzieł u vuličnych bajach, kali jany buduć vieścisia pry vyzvaleńni Chiersona.
Uletku Ihar atrymaŭ niekalki zadańniaŭ pierachavać schovanki sa zbrojaj i ŭ kancy žniŭnia byŭ złoŭleny rasijskimi vajskoŭcami. Jon pravioŭ 11 dzion u śledčym izalatary, dzie, pavodle źviestak The Washington Post, katavali źniavolenych. Adsiul mužčynu adpuścili pry ŭmovie, što pra svaje kantakty z ukrainskimi śpiecsłužbami jon budzie dakładvać rasijskim vajskoŭcam. Adnak naŭrad ci takim čynam rasijanie zmahli daviedacca niešta kaštoŭnaje: u Ihara ź jaho kaardynataram byŭ tajemny kod. Papiaredžańniem ab niebiaśpiecy moh być adkaz «ok» zamiest «dobra».
U vieraśni, pa słovach Ihara, jon źniaŭ na videa niekalki hruzavikoŭ rasijskich vajskoŭcaŭ, jakija byli pryparkavany na aŭtastajancy pry vyjeździe z horada. Mužčyna zrabiŭ vyhlad, što razmaŭlaje pa telefonie, prykłaŭšy jaho da vucha, u toj čas jak kamiera zapisvała ŭsio, što adbyvajecca. Praz paru dzion pa hetym miescy USU nanieśli artyleryjski ŭdar.
Z «Dymam» Ihar upieršyniu sustreŭsia ŭžo paśla adychodu rasijskaj armii z horada.
U Słužby biaśpieki Ukrainy taksama byli svaje ludzi ŭ akupavanym Chiersonie. Jak pišuć žurnalisty, adna ź ich — miascovaja čynoŭnica Iryna. Padčas akupacyi jana rehularna pieradavała ŭkrainskim śpiecsłužbam infarmacyju pra toje, jak uładkavanaja stvoranaja rasijanami administracyja i chto ź miascovych žycharoŭ ź joj supracoŭničaje.
Adnojčy da Iryny dadomu pryjšli inšyja partyzany i paprasili ŭ jaje dazvołu zakapać pobač ź jaje domam niekatoryja rečy. Paśla sychodu rasijan z horada schovanku adkapali — jak raspaviali Irynie znajomyja z SBU, u im było toje, što treba dla vytvorčaści vybuchoŭki.
Dva ananimnyja ŭdzielniki supracivu, ź jakimi pahutaryła vydańnie, raspaviali, što zabili niekalki pjanych rasijan, kali tyja išli pa vulicy adny. Surazmoŭcy haziety skazali, što nanosili ŭdary nažom. Vydańnie nie zmahło pravieryć ich słovy.
Ukrainskaje padpolle, u jakim brali ŭdzieł jak miascovyja žychary, tak i supracoŭniki śpiecsłužbaŭ, sfarmavałasia nie tolki ŭ Chiersonskaj vobłaści. Z pačatku vajny na ŭziatych Rasijaj pad svoj kantrol terytoryjach byli arhanizavany dziasiatki napadaŭ na čynoŭnikaŭ, jakija supracoŭničajuć z Rasijaj, mnohija ź ich zahinuli.
Ciapier čytajuć
Vybityja dźviery, maski-šou, zatrymańnie top-mieniedžaraŭ. Pačaŭsia pahrom «Jeŭraopta»25
Kamientary