Dudzinski patłumačyŭ, čamu jon pahadziŭsia na debaty z Azaronkam
U minułuju subotu na jutubie prajšli debaty pamiž prapahandystam Ryhoram Azaronkam, błohieram Juryjem Cieracham (viadomym jak «Ludažor»), žurnalistam Dzianisam Dudzinskim i byłym bajpołaŭcam Aleham Talerčykam. Pieršyja dva znachodzilisia ŭ studyi ŭ Biełarusi, ich apanienty — u Polščy. Što havaryli adzin adnomu ludzi, jakija znachodziacca pa roznyja baki barykad, i navošta hetyja debaty?
Pa sutnaści, vyznačeńniu debaty hetaja sustreča nie adpaviadała ni ŭ adnu z chvilin tranślacyi: na videa abodva baki zasypali adzin adnoha abrazami abo abaranialisia z dapamohaj sarkazmu. Taksama ŭ pracesie razmovy časta vykarystoŭvalisia manipulacyi zamiest adkazaŭ na pytańni. Novaj infarmacyi šarahovy hladač dla siabie nie vynies: usio, što prahučała ŭ efiry, my čuli raniej (i nie raz).
Naprykład, prapahandyst Ryhor Azaronak u svajoj zvykłaj maniery kryčaŭ uvieś efir i zakidvaŭ apanientaŭ razmovami pra Ukrainu, ZŠA. Taksama Azaronak nieadnarazova pierapyniaŭ apanientaŭ i nie davaŭ im vykazacca pa sutnaści — hetki styl Łukašenki padčas jaho naradaŭ i kanfierencyj. Viadučy sprabavaŭ jaho pierapynić, ale nie atrymałasia.
Ale ž try astatnija udzielniki efiru, jak i viadučyja, nie pavyšali hołasu i sapraŭdy sprabavali pahutaryć, a nie vypalić jak maha bolš abraz. Niahledziačy na heta, abodva baki nieadnarazova paŭtarali adzin adnomu, što kožnaha ź ich apanientaŭ čakaje sudovaje pasiadžeńnie i turemnyja terminy, abvinavačvali adzin adnaho ŭ złačynstvach.
U vyniku kožny ŭsio roŭna prytrymlivaŭsia svajoj pazicyi. I, imavierna, nie zmoh zrazumieć procilehły bok ni na kaliva.
Pra toje, jakija ŭražańni pakinuli debaty, my spytali ŭ adnaho ź ich udzielnikaŭ — Dzianisa Dudzinskaha. Taksama spytali ŭ žurnalista, ci jość sens u takich sustrečach.
Dudzinski raspavioŭ, što na sustreču jaho paklikali arhanizatary debataŭ — i jon lohka pahadziŭsia.
«Pa sutnaści, heta maja praca: vychodzić na ekran u žyvym efiry i niešta havaryć, ź niekim razmaŭlać, zadavać pytańni i adkazvać na ich. Mnie było biez roźnicy, z kim razmaŭlać, a tut tym bolš Azaronak — nie toje kab moj fietyš (śmiajecca), a litaraturny vobraz, jaki ja vypieščvaju i pialehuju. U hetym vypadku, darečy, «azaronak» pišacca z maleńkaj litary», — adznačyŭ žurnalist.
Pavodle mierkavańnia Dzianisa Dudzinskaha, u arhanizacyi takich «sutyknieńniaŭ iłbami» jość sens.
«Pa-pieršaje, debaty isnujuć nie dla apanientaŭ, a dla treciaha boku — hledačoŭ. (…) Heta svojeasablivaje šoŭ, padčas prahladu jakoha ludzi buduć rabić svaje vysnovy. My ž viedali, što biełarusam, jakija znachodziacca ŭ Biełarusi, dazvolać pahladzieć apazicyjny kanał — rekłama kruciłasia šmat u jakich dziaržaŭnych pablikach.
Ja razumieŭ, što nijakich kankretnych pytańniaŭ i adkazaŭ tam nie budzie. Viedaŭ, što tam buduć «azaronki» i jany buduć pavodzić siabie jak «azaronki». I treba było dać mahčymaść Ryhoru i jaho paplečniku prakryčacca i pramaciuhacca, kab pa mahčymaści tyja samyja ludzi, jakija ŭžo nie hladziać Azaronka na STB, ubačyli i skazali: dziakuj bohu, što my jaho i nie hladzim.
Ja vielmi aścierahaŭsia, što ŭ žyvym efiry zamiest zvykłaha Azaronka źjavicca miły, dobry i intelihientny čałaviek. Što jon budzie apieryravać faktami i zakonami, zadavać pytańni i adkazvać na ich, vysłuchoŭvać inšych — heta było b horš za ŭsio», — raspavioŭ Dudzinski.
Jon dadaŭ, što asnoŭnaj zadačaj — jaho i paplečnika — było vyvodzić Azaronka ź siabie. Usie abvinavačvańni i manipulacyi prapahandysta ŭ adnosinach da asob Dudzinskaha i Talerčyka byli dla ich pradkazalnymi.
«Ščyra kažučy, my dumali, što i Cierach budzie takim ža, ale jon pavodziŭ siabie prymalna. Čałaviek, ź jakim možna było razmaŭlać», — adznačyŭ Dzianis Dudzinski.
Arhanizavaŭ anłajn-sustreču jutub-kanał «Płatforma 375» z 3,3 tysiačy padpisantaŭ. Na im užo vychodzili debaty z udziełam łukašenkaŭskich prapahandystaŭ — hod tamu spračalisia Azaronak i Bałkuniec, Cierach i Karač, Vaskrasienski i Ščyhielski. Kanał byŭ zarehistravany ŭ krasaviku 2021 hoda i pazicyjanuje siabie jak «niezaležnaja miedyjaplacoŭka».
Viadoŭcam ciapierašnich debataŭ byŭ žurnalist Kirył Paźniak. Jon razmaŭlaŭ pa-biełarusku i pavodziŭ siabie spakojna, niahledziačy na pierapałku ŭ jaho pad nosam. U kamientarach hledačoŭ ździviła, što taki farmat uvohule arhanizavany na biełaruskaj terytoryi — Paźniak siadzieŭ u adnoj studyi z Azaronkam i Cieracham.
Ciapier čytajuć
Śpiavačku Meryjem Hierasimienka na praciahu dvuch hadoŭ źbivaŭ muž17
Śpiavačku Meryjem Hierasimienka na praciahu dvuch hadoŭ źbivaŭ muž
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»33
Kamientary