Biehły małdoŭski biznesmien Iłan Šor prachodzić pa spravie ab «kradziažy miljarda». Pavodle pastanovy suda, jon pavinien viarnuć u dziaržbiudžet Małdovy amal 5,3 młrd lejeŭ.
Sud u Kišyniovie zavočna asudziŭ źbiehłaha biznesoŭca i lidara prarasijskaj apazicyjnaj partyi «Šor» Iłana Šora da 15 hadoŭ pazbaŭleńnia voli. «Šor asudžany da 15 hadoŭ pazbaŭleńnia voli. Asudžany pavinien viarnuć bolš za 5,3 młrd lejeŭ (blizu 288 młn dalaraŭ)», — havorycca ŭ paviedamleńni Apielacyjnaj pałaty Małdovy.
Sam Šor nazvaŭ rašeńnie niezakonnym. «Siońniašnim rašeńniem ułada pomścić mnie za pratesny ruch, za toje, što ja i maja kamanda zmahajemsia za hodnaje žyćcio hramadzian. Mianie hetaje rašeńnie absalutna nie biantežyć, jano mnie absalutna ŭsio roŭna. Ja nie źbirajusia padparadkoŭvacca, hetaja pastanova budzie skasavanaja roŭna na druhi dzień paśla źmieny dziejnaha režymu», — zajaviŭ Šor u svaim telehram-kanale.
Šor źjaŭlajecca adnym ź fihurantaŭ skandału z vyvadam 1 młrd dalaraŭ z bankaŭskaj sistemy Małdovy, jaki ŭ krainie nazvali «kradziažom stahodździa». Jon razhareŭsia ŭ 2015 hodzie, spravakavaŭ akcyi pratestu ŭ Kišyniovie i padzieńnie dvuch uradaŭ i kirujučaj kaalicyi prajeŭrapiejskich partyj, jakija padtrymlivali ZŠA i ES. U Kišyniovie ŭłady nazvali akcyi pratestu častkaj rasijskaj zmovy z metaj źviaržeńnia ŭrada Małdovy i zamieny jaho na prarasijski.
Hrošy byli vyviedzienyja praz Banca de Economii, Banca Sociala i Unibank, jakija byli padkantrolnyja Šoru. Jon byŭ asudžany pa hetaj spravie, ale abskardziŭ prysud i da kančatkovaha rašeńnia znachodziŭsia pad sudovym kantrolem, što nie pieraškodziła jamu ŭznačalić partyju i abracca deputatam parłamienta. Adnak paśla čarhovaj źmieny ŭłady ŭ červieni 2019 hoda Šor źbieh u Izrail — krainu, dzie jon naradziŭsia.
Partyja «Šor» paśla rasijskaha ŭvarvańnia va Ukrainu letaś pačała aktyŭna ŭzajemadziejničać z uładami RF, deputaty naviedali Maskvu i naładzili mižpartyjnyja kantakty. Paśla hetaha partyja arhanizoŭvała pratesnuju dziejnaść suprać dziejnaj ułady ŭ Małdovie, paviedamlaje Deutsche Welle.
Prezidentka Małdovy sklikaje Vialiki nacyjanalny schod
Małdova pazbaŭlajecca ad rasijskaha hazu: pastaŭlać haz joj płanuje hrečaskaja kampanija
Dziaržaŭnaj movaj Małdovy zamiest małdaŭskaj stała rumynskaja
U Maskvie mužčyny masava sprabujuć znajomicca, macajučy dziaŭčat za jahadzicy. Tak zahadaŭ rabić seks-koŭč ź Biełarusi8
Kamientary