Novy prezident Łatvii: Pieraškoda ŭstupleńnia Ukrainy ŭ NATO nie Vienhryja
Ministr zamiežnych spraŭ i abrany prezident Łatvii Edhar Rynkievič adznačyŭ, što Vienhryja nie hałoŭnaja pieraškoda na šlachu Ukrainy da NATO — havorka idzie pra niavyznačanaść pazicyi bolš šyrokaha koła krain.
Rynkievič adznačyŭ, što hałoŭnaja pieraškoda dla ŭstupleńnia Ukrainy ŭ Paŭnočnaatłantyčny aljans — heta ŭnutranaja dyskusija ŭ NATO, a nie sama Ukraina ci sakretnaje «vieta» Rasii, piša «Ukrainskaja praŭda».
«Pryčyna — u tym, što ciapier u mnohich stalicach dziaržaŭ — čalcoŭ NATO niama dastatkova vyraznaha razumieńnia, što rabić ź situacyjaj, kali dziaržava, jakaja vajuje, dałučajecca da Aljansu, i što heta značyć u kantekście «piataha artykuła».
«Skažu prama: voś heta hałoŭnaje pytańnie. I mienavita na hetaje pytańnie mnohija dziaržavy-čalcy nie mohuć dać adkazu. I pakul jany nie buduć mieć hety adkaz sami dla siabie, to nie zmohuć adkazać i za adnym stałom ź inšymi členami NATO», — adznačyŭ Edhar Rynkievič.
Na jaho dumku, kali b hetaja pazicyja sfarmavałasia, to pieraškodaj nie pavinna być navat mierkavańnie aficyjnaha Budapiešta.
«Ja liču, što kali dojdzie da finalnaha pracesu pryniaćcia rašeńnia, to ja vieru, što ŭsie biez vyklučeńnia sajuźniki pahodziacca. Ale pakul pieraškodaj źjaŭlajecca voś hetaje klučavoje pytańnie. Jość kraina ŭ vajnie. Jość «piaty artykuł» NATO. I ciapier nie adna-dźvie dziaržavy, a vielmi mnohija dziaržavy sprabujuć zrazumieć, što heta značyć dla Aljansu. U mnohich stalicach da hetaha času nie źjaviłasia dobraha adkazu na hetaje pytańnie, i my pavinny heta zrazumieć», — dadaŭ jon.
Rynkievič adznačyŭ, što Łatvija bačyć budučyniu Ukrainy ŭ NATO i sa svajho boku budzie rabić usio mahčymaje dziela taho, kab heta adbyłosia.
Ciapier čytajuć
U Minsku zaviaršyli budaŭnictva piacizorkavaha hatela na miescy kolišniaha «Biełekspa»5
U Minsku zaviaršyli budaŭnictva piacizorkavaha hatela na miescy kolišniaha «Biełekspa»
Sumleńnie, kachańnie, koły piekła i halivudski finał. U siamji budaŭnika i biblijatekarki z Pružanskaha rajona Ihara i Julii Łaptanovičaŭ aryštavali spačatku jaho, paśla — jaje, a paśla i babulu33
Kamientary