Prezident Ukrainy Uładzimir Zialenski ŭ viačernim zvarocie 10 lipienia faktyčna paćvierdziŭ svoj udzieł u samicie Paŭnočnaatłantyčnaha aljansu ŭ Vilni, paviedamlaje «Jeŭrapiejskaja praŭda».
U svaim zvarocie Zialenski, praŭda, adkryta nie skazaŭ, što budzie prysutničać u Vilni asabista,
ale zvarot zaviaršyŭ słovami: «Heta honar dla mianie — pradstaŭlać takich ludziej i takuju Ukrainu!» Taksama jon zhadaŭ pra zapłanavanyja ŭ ramkach Vilenskaha samitu «dvuchbakovyja sustrečy roznaha ŭzroŭniu — krainy Jeŭropy, Amieryka, Kanada, Japonija».
«Pryjarytety absalutna vidavočnyja — heta supraćpavietranaja abarona dla našych haradoŭ, dla ŭsich supolnaściaŭ na ŭsioj terytoryi krainy, my pracujem nad stvareńniem paŭnavartasnaha pavietranaha ščyta», — dadaŭ prezident Ukrainy.
Da apošniaha ŭkrainski bok nie paćviardžaŭ i nie abviarhaŭ udziełu prezidenta Zialenskaha ŭ samicie Paŭnočnaatłantyčnaha aljansu 11 i 12 lipienia. Ale ŭ paniadziełak hienieralny sakratar NATA Jens Stołtenbierh skazaŭ: «Prezident Zialenski dałučycca da nas na inaŭhuracyjnym pasiadžeńni Rady Ukraina — NATA». Heta pasiadžeńnie zapłanavana na 12 lipienia.
Kamientary