«Možna skazać, adskočyŭ». Byłomu litoŭskamu futbalistu, jaki chvaliŭ Łukašenku i kazaŭ, što ŭ biełarusaŭ «kałhasny mientalitet», dali 7 hadoŭ turmy
U 2021 hodzie były litoŭski futbalist Simas Skinderys, jaki ŭ nulavyja i dziasiatyja hulaŭ u biełaruskim čempijanacie, a paśla zastaŭsia žyć u Biełarusi, stvaryŭšy tut siamju, ździviŭ, vykazaŭšysia ŭ padtrymku Łukašenki. A ŭžo ŭ pačatku 2022-ha ździviŭ znoŭ, kali vyjaviłasia, što suprać jaho zaviedzienaja kryminalnaja sprava pa surjoznym artykule. Što ź im ciapier, praz paŭtara hoda, daviedałasia «Trybuna».
U 2000-ch i 2010-ch litoviec Simas Skinderys byŭ svaim u biełaruskim futbole: na pazicyi hałkipiera vystupaŭ za šerah ajčynnych kłubaŭ, a z «Minskam» braŭ bronzu ČB.
Paśla zakančeńnia karjery jon źnik z pola zroku biełaruskich zaŭziataraŭ, ale ŭ pačatku 2021-ha raptam źjaviŭsia ŭ miedyjnaj prastory, kab, jak akreśliŭ jahony były adnakłubnik Alaksandr Śviarčynski, «ździejśnić intelektualny kaminh-aŭt».
Tady bramnik, jaki paśla zakančeńnia spartyŭnaj karjery zastaŭsia žyć u Minsku, u intervju zajaviŭ pra padtrymku režymu Łukašenki i jahonych mietadaŭ baraćby ź mirnym nasielnictvam paśla vybaraŭ, adznačyŭšy zaadno, što ŭ biełarusaŭ «kałhasny mientalitet», a tamu ź imi treba być bolš žorstkim.
A ŭ lutym 2022-ha stała viadoma pra toje, što Skinderys zatrymany jak fihurant kryminalnaj spravy. Krynicy «Trybuny» paviedamlali, što litoviec trapiŭ u žodzinskuju turmu za niejkija spravy, źviazanyja z narkotykami. Pry hetym, pa jakim artykule prachodziŭ eks-futbalist, zastavałasia nieviadomym. Hetaha nie viedali navat tyja, chto ź im padtrymlivaŭ choć niejkija stasunki.
Ciapier «Trybuna» pasprabavała daviedacca, jak źmianiłasia situacyja za paŭtara hoda paśla zatrymańnia. Dla hetaha žurnalisty razmaŭlali z mnohimi pradstaŭnikami i biełaruskaha, i litoŭskaha futboła, ź ludźmi, jakija tak ci inakš padtrymlivali suviaź sa Skinderysam, hulali ź im ci pracavali.
Vyśvietliłasia, što kolkaść tych, kamu cikavy los Skinderysa, z časam nabliziłasia da nula. Mnohija surazmoŭcy zhadvali intervju 2021 hoda i pryznavalisia, što paśla słoŭ pra biełarusaŭ i padtrymku dyktatury navat viedać nie chočuć hetaha čałavieka. Niechta adviarnuŭsia ad litoŭca paśla taho, jak jon trapiŭ u historyju z narkotykami.
I ŭsio ž sioje-toje vyśvietlić udałosia. 22 śniežnia 2021 hoda Skinderys pabyvaŭ na navahodnim ranišniku ŭ dački, pra što raskazaŭ u fejsbuku. I heta byŭ apošni post litoŭca ŭ sacyjalnych sietkach.
U toj čas Skinderys nibyta vychvalaŭsia pierad znajomymi, što chutka stanie bahatym, zrešty, nie ŭdakładniajučy, jakim čynam. A nieŭzabavie zjaviłasia navina pra zatrymańnie.
Litoŭca nibyta padazravali ŭ tym, što jon źbiraŭsia arhanizavać pastaŭku narkotykaŭ u Biełaruś, ale jaho chutka nakryli, tak i nie daŭšy razharnucca. Paśla zatrymańnia Skinderys znachodziŭsia ŭ turmie ŭ Žodzinie.
U pieršaj pałovie 2022-ha nad im adbyŭsia sud. Jakija kankretna abvinavačańni byli vystaŭlenyja, daviedacca nie ŭdałosia, adnak viadoma, što byłomu futbalistu pahražała da 12 hadoŭ pazbaŭleńnia voli.
Kali adšturchoŭvacca ad hetaha terminu, možna mierkavać, što Skinderysa sudzili pa č. 3 art. 328-1 KK «Niezakonnaje pieramiaščeńnie praz mytnuju miažu Jeŭrazijskaha ekanamičnaha sajuza i (abo) dziaržaŭnuju miažu Respubliki Biełaruś narkatyčnych srodkaŭ, psichatropnych rečyvaŭ abo ich prekursaraŭ ci anałahaŭ». Častka 3 hetaha artykuła za złačynstva ŭ hrupie jakraz praduhledžvaje pakarańnie ad 7 da 12 hadoŭ pazbaŭleńnia voli.
U vyniku, jak udałosia daviedacca, Skinderysu dali siem hadoŭ, i jon užo adbyvaje termin, zdajecca, pa-raniejšamu ŭ Žodzinie.
Na voli ŭ eks-hulca zastalisia žonka i dačka. Da kryminalnaha etapu siamja žyła na zdymnaj kvatery ŭ Minsku, ale ciapier, jak havorać krynicy «Trybuny», chutčej za ŭsio, žonka razam z dačkoj viarnułasia da baćkoŭ — jana rodam ź Minska.
U pracesie padrychtoŭki materyjału ludzi, jakija tak ci inakš viedali Skinderysa, vykazvali svajo mierkavańnie pra situacyju, u jakoj toj apynuŭsia. Adzin z surazmoŭcaŭ vydańnia adznačyŭ:
«Pakul jon hulaŭ, ničym starońnim nie zajmaŭsia, byŭ zachopleny futbołam. A što potym zdaryłasia, niezrazumieła. Moža, zachaciełasia vialikich hrošaj… Viedaju, jon chacieŭ lohka razbahacieć. Ale, miarkujučy pa ŭsim, u chutkim časie zrabić hetaha nie atrymajecca. Plus u jaho ŭ Paniaviežysie, rodnym horadzie, byli niejkija niezrazumiełyja siabručki. Mahčyma, jany taksama akazali svoj upłyŭ».
Jašče adzin surazmoŭca zhadaŭ pra tych, chto atrymlivaje ŭ Biełarusi kudy bolšyja terminy za toje, što prosta vykazvaŭ svajo mierkavańnie:
«U nas palityčnyja źniavolenyja atrymlivajuć niejmaviernyja terminy, pa sutnaści, ni za što. A tut dzivak nakruciŭ spraŭ na realnuju kryminałku, a atrymaŭ tolki siem hadoŭ. Možna skazać, adskočyŭ».
«Razrucha i kryzis nijak nie źviazanyja z sankcyjami». Što nie tak ź listom Uładzimira Kanaplova da kiraŭnika suśvietnaha handboła
«U imia pieramohi miru i humanistyčnych ideałaŭ». Uładzimir Kanaploŭ prosić dazvolić biełaruskim handbalistam hulać choć z Azijaj i Afrykaj
Vynieśli prysud byłomu spartyŭnamu dyrektaru «Šachciora». Jaho adpuścili ŭ zale suda
Kamientary