Kaho zatrymlivajuć paśla pravierki telefona na miažy? Nazirańni ź izalatara
Padčas znachodžańnia ŭ Bresckim IČU Alaksandr Ramanovič, pinski pravaabaronca i hramadski aktyvist, sustrakaŭ ludziej, jakich zatrymali na biełaruskaj miažy paśla raptoŭnaj pravierki telefonaŭ. Chto i što cikaviła siłavikoŭ?
Alaksandr kaža, što zatrymlivajuć absalutna roznych ludziej — niejkuju zakanamiernaść vyłučyć niemahčyma.
Na pravierku mohuć adpravić nie tolki tych, chto doŭhi čas nie źjaŭlaŭsia ŭ Biełarusi. Naprykład, z Alaksandram siadzieŭ pradprymalnik, jaki pa pracoŭnych spravach pajechaŭ u Polšču nienadoŭha — a na zvarotnym šlachu ŭ jaho na miažy znajšli staruju padpisku.
— Ja čuŭ navat historyju pra toje, što zatrymali kiroŭcu fury — jaho adviali, a fura tak i zastałasia na miažy.
Pravaabaronca adznačaje: nie treba dumać, byccam patrabavać pakazać telefon mohuć tolki ŭ tych, chto trapiŭ u bazu «BIESparadki» ci niedzie zaśviaciŭsia.
Siarod zatrymanych byli ludzi, jakija nie ŭdzielničali ŭ pratestach i ŭvohule zvyčajna nie chvalavalisia pierad pajezdkaj za miažu nakont taho, što ŭ ich pačnuć niešta praviarać u telefonie.
— Znachodziać toje, pra što čałaviek užo i sam zabyŭsia — niejkija reposty, padpiski. Kali čałaviek nie vielmi aktyŭna karystajecca sacyjalnymi sietkami, ci budzie jon pamiatać, što ŭ 2020 hodzie repościŭ niešta z resursu, jaki ŭ toj momant nie ličyŭsia ekstremisckim?
Alaksandr kaža, što pa jaho nazirańniach u bolšaści vypadkaŭ ludzi ŭsio ž atrymlivali štrafy, a nie sutki.
Ale imavierna, heta źviazana z tym, što jany nie byli aktyŭnymi ŭdzielnikami pratestaŭ.
***
«Naša Niva» stvaryła šmat hajdaŭ pa roznych halinach biaśpieki. Jany prydaducca vam pry ačystcy smartfona, a ich vykanańnie zojmie čas.
Pačyścicie telehram i inšyja miesiendžary. Asobna źviarnicie ŭvahu na ŭkładki «spampavanyja» i «miedyja» (jak ich pačyścić my pisali tut). Kab razumieć mahčymaści siłavikoŭ pry pošuku ŭ telehramie — pračytajcie artykuł. Źviarnicie ŭvahu na toje, jak vyčyścić «ekstremisckija» telehram-boty z vašaha akaŭnta.
Pačyścicie vaš Instagram. Potym pahladzicie na «Adnakłaśniki», «Ukantakcie» i Facebook. Pierapraviercie vašy łajki. Kali vy achviaravali praz Facebook, to pahladzicie jak vydalić akaŭnt pravilna. Asobna źviarnicie ŭvahu na TikTok (1 častka, 2 častka).
Paśla hetaha pierapraviercie YouTube i Google-akaŭnt.
Prahladzicie halereju i pačyścicie fota adtul, paśla pierapraviercie Google Photos. Kali ŭ vas iPhone, to vam pasuje hety hajd.
My pisali pra toje, jak zrazumieć, što vy ŭ niebiaśpiecy, kali vy niekudy achviaravali (asobna — pra Patreon i Stripe). Taksama — pra toje, jakich danacioraŭ sadziać za kraty. A tut — pra toje, jakaja imaviernaść taho, što vaš telehram-akaŭnt zdeananimizavali. Źviarnicie na ich uvahu.
Ciapier čytajuć
Žychary Hrušaŭki i Michałova zastajucca biez deputatki: čempijonka Mirončyk-Ivanova źbirajecca ŭ dekret13
Kamientary