Što novaha praviarajuć u telefonach na miažy pry viartańni ŭ Biełaruś
Śpiecsłužby Biełarusi pačali łazić u telefonach na miažy jašče bolš prydzirliva. Raskazvajem, što źmianiłasia i jak abaranicca.
Što novaha hladziać u telefonie
Pa paviedamleńniach vidavočcaŭ, šmat času śpiecsłužbisty na miažy pačali nadavać vyvučeńniu prahramy «Telefon» i śpisaŭ apošnich telefanavańniaŭ.
Jašče adzin punkt — telefonnyja knihi i kantakty tam. Taksama vielmi šmat uvahi nadajuć kantaktam u telehramie.
Pa našych źviestkach, prahladajuć taksama archivy pošty.
Jak pačyścić telefonnyja knihi
Śpis telefanavańniaŭ na androidzie vydalić prosta (na ajfonach schiema padobnaja).
Adkryjcie prahramu «Telefon». Pierajdzicie ŭ śpis apošnich vyklikaŭ. Naciśnicie toj numar, jaki vy chacieli b vydalić. Adkryjecca mieniu — tam treba nacisnuć «Vydalić».
Paśla adkryjecca akienca paćviardžeńnia. Naciśnicie «Vydalić» jašče raz.
Jak pačyścić śpis kantaktaŭ u telefonie
Kab vydalić niekaha z kantaktaŭ na Android, zajdzicie ŭ prahramu «Telefon» i abiarycie punkt «Kantakty».
Adšukajcie kantakt, jaki chočacie vydalić. Naciśnicie na jaho.
Naciśnicie na try kropki ŭ pravym vierchnim kucie.
Dalej adkryjecca mieniu. Naciśnicie «Vydalić» i paćvierdzicie vydaleńnie.
Jak pačyścić kantakty ŭ telehramie
Što da kantaktaŭ u Telegram, to vy možacie vydalić ich i zabaranić ich sinchranizacyju, kab palepšyć vašu biaśpieku.
Dla hetaha naciśnicie na try ryski ŭ levym vierchnim kucie ekrana. Dalej abiarycie «Nałady» i ŭvajdzicie ŭ punkt «Pryvatnaść i biaśpieka».
Dahartajcie punkt «Pryvatnaść i biaśpieka» da punkta «Kantakty». Naciśnicie «Vydalić sinchranizavanyja kantakty» i paćvierdzicie vydaleńnie. Paśla adklučycie punkt «Sinchranizavać kantakty» i «Prapanoŭvać častyja kantakty».
Jak pačyścić huhł-poštu
Pra toje, jak pačyścić huhł-poštu, raskazvajecca ŭ našym vialikim hajdzie pra ačystku Google-akaŭnta. Dla elektronnaj pošty ad luboha inšaha servisu schiema budzie padobnaj.
«Razvod» na pryznańnie
Apošnim časam, pa źviestkach našych čytačoŭ, usio čaściej padčas dopytaŭ ludziej sprabujuć «raźvieści» na pryznańnie ŭ peŭnych dziejańniach — udziele ŭ pratestach, achviaravańniach fondam salidarnaści ci rečach takoha kštałtu. Taksama padčas takoj hutarki na miažy na ludziej mahli kryčać i pahražać. Pryčym u niekatorych navat nie hladzieli techniku, a prosta hutaryli ŭ takim klučy.
Važna padrychtavacca da dopytu maralna i nie vieścisia na pravakacyi. Kali vy achviaravali nie ź biełaruskaj kartki ci praz daŭno ŭžo vydaleny abo ananimny fejsbuk, to dakazać heta praktyčna niemahčyma (u fejsbuku šmat płatnych opcyj — da prykładu, zakupy ŭ hulniach). Kali vy achviaravali pryvatna, dakazać heta śpiecsłužbisty na miažy taksama nie zdolejuć.
A što jašče hladziać i jak abaranicca?
Pa raniejšych historyjach viadoma, što siłaviki mohuć prahladać taksama:
- Telegram. Pryčym usio ŭ im — kanały, čaty, kantakty, spampavanyja fota i videa, pierasłanyja spasyłki.
- Inšyja miesiendžary — da prykładu, fejsbuk-miesiendžar i vajbier.
- Youtube — padpiski, łajki, kamientary, prahledžanyja i schavanyja videa.
- Halereja fota, u tym liku huhł-fota i iCloud.
- Sacyjalnyja sietki. Siłavikoŭ mohuć zacikavić padpiski, paviedamleńni, łajki i kamientary.
Što možna zrabić, kab abaranicca?
Spačatku varta pačyścić vaš telehram i inšyja miesiendžary. Jašče lepš — pračytajcie artykuł pra toje, jak šukajuć ludziej u telehramie ŭvohule. A taksama pra toje, jak vyčyścić «pratesnyja» telehram-boty z vašaha akaŭnta. A paśla — papki «Spampavanyja» i «Miedyja», pra jakija my pisali ŭ hajdzie pra pierasiačeńnie miažy.
Paśla vyčyścicie vaš Instagram. Potym prahladzicie «Adnakłaśniki», «UKantakcie» i Facebook. Asobna źviarnicie ŭvahu na vašy łajki. A voś instrukcyja dla tych, chto achviaravaŭ praz Facebook — jak vydalić akaŭnt u Facebook pravilna.
Paśla hetaha vyčyścicie vaš YouTube i huhł-akaŭnt.
Varta taksama prahladzieć halereju i pačyścić fota, a paśla — Google Photos i iCloud (asobnaha hajda pra jaho ŭ nas niama, ale šmat napisana ŭ artykule pra ačystku fota).
Kali ŭ vas niama sił na hetyja manipulacyi, to možna ŭziać asobny telefon dla pierasiačeńnia miažy, całkam čysty.
«Naša Niva» — bastyjon biełaruščyny
PADTRYMAĆ
Asudžany za «Hajun» da chimii brat Ihara Łosika ŭciok ź Biełarusi3
Asudžany za «Hajun» da chimii brat Ihara Łosika ŭciok ź Biełarusi
Piśmieńnica Taćciana Zamiroŭskaja raskazała pra novuju knihu, sny pra Łukašenku, košt žyćcia ŭ Ńju-Jorku i toje, čamu złuje na niekatorych biełarusaŭ1616
Kamientary