U niefarmalnym źjeździe biełaruskich kiniematahrafistaŭ u Varšavie voźmie ŭdzieł Kšyštaf Zanusi
Majstar-kłas kłasika polskaha i suśvietnaha kino Kšyštafa Zanusi «Ad amatarskaj karotkamietražki da Kanaŭ i Vieniecyi» stanie adnym z hvazdoŭ prahramy pieršaha niefarmalnaha źjezda biełaruskich kiniematahrafistaŭ, jaki ŭ hetyja vychadnyja adbudziecca ŭ Varšavie, paviedamlaje Reform.by.
Padzieja, na jakuju płanujecca pryjezd bolš jak 70 biełaruskich filmmejkieraŭ ź Litvy, Łatvii, Ukrainy, Polščy, Turcyi, Hiermanii, Čechii, Izraila, Hruzii, adbudziecca ŭ Varšavie ŭžo ŭ hetyja vychadnyja — 18—20 žniŭnia.
Źjezd projdzie ŭ farmacie Barcamp — svojeasablivaj antykanfierencyi, jakaja praduhledžvaje aktyŭny ŭdzieł biełaruskich kiniematahrafistaŭ z roznym dośviedam i śpiecyjalizacyjaj. Prahramu źjezda ŭdzielniki vyznačali samastojna — možna było prapanavać temu dla abmierkavańnia, svaje mierapryjemstvy, pakaz filma.
«Farmat barkempa, abrany nami dla praviadzieńnia źjezda niezaležnych kiniematahrafistaŭ, apraŭdvaje efiektyŭnaść haryzantalnych suviaziaŭ užo na etapie płanavańnia padziei, — zaznačaje kiraŭnik prajekta, pradziusar i fandrajzier Leanid Kalicienia. —
My ŭklučyli ŭ prahramu šmatlikija prapanovy ŭdzielnikaŭ i pakinuli volnyja słoty dla realizacyi idej filmmejkieraŭ «na miescy». Bo padčas uzajemadziejańniaŭ, na chvali ahulnaha drajvu i naradžajucca samyja aryhinalnyja kancepcyi. Pačatak ruchu da stvareńnia ahulnaj stratehii raźvićcia biełaruskaha kino pakładzieny».
Kamientary