Vučonyja adkryli, što palimier z takoha vidu much, jak čornyja lvinki, źjaŭlajecca šmatabiacalnaj krynicaj dla stvareńnia bijaraskładalnaha płastyku.
Jak piša The Guardian, svajo adkryćcio vučonyja ahučyli na pasiadžeńni Amierykanskaha chimičnaha tavarystva. Jany śćviardžajuć, što miortvych much vidu čornaja lvinka (Hermetia illucens) možna pieratvaryć u bijaraskładalny płastyk. Adkryćcio vyhladaje vielmi karysnym, bo ciažka znajści krynicy bijaraskładalnych palimieraŭ, jakija nie majuć inšaha vykarystańnia.
«Na praciahu 20 hadoŭ maja hrupa raspracoŭvała mietady pieratvareńnia naturalnych praduktaŭ, naprykład, hlukozy, atrymanaj z cukrovaha tryśniahu ci dreŭ, u palimiery, jakija raskładajucca, zasvojvajucca, a nie zachoŭvajucca ŭ navakolnym asiarodździ. Ale hetyja naturalnyja pradukty atrymlivajucca z resursaŭ, jakija taksama vykarystoŭvajucca dla vytvorčaści praduktaŭ charčavańnia, paliva, budaŭnictva i transpartu», —
adznačyła hałoŭnaja daśledčyca z Techaskaha ŭniviersiteta A&M Karen Vuli.
Navukoŭcy ličać, što dla vytvorčaści płastyku z pośpiecham možna vykarystoŭvać adkidy, jakija zastalisia ad vyroščvańnia čornych ilvinak.
Heta nasiakomaje razvodziać u pramysłovym maštabie ŭ jakaści alternatyŭnaj krynicy białku i inšych pažyŭnych rečyvaŭ dla karmavych met. Hetaja kazurka — adzin ź niamnohich vidaŭ nasiakomych, uchvalenych dla vykarystańnia ŭ jakaści kormu ŭ akvakultury ŭ ES.
Adnak darosłyja muchi nie majuć karyści i vykidvajucca paśla karotkaha žyćcia. Navukoŭcy pasprabavali vykarystać ich, kab vyrabić karysnyja materyjały. Viadoma, što chicin, palimier na asnovie cukru, umacoŭvaje pancyr ci ekzaškilet nasiakomych i rakapadobnych.
Pancyry krevietak i krabaŭ užo vykarystoŭvajucca dla zdabyćcia chicinu. Daśledčyki zajavili, što chicinavy parašok, atrymany ad much, čyściejšy, čym parašok z rakapadobnych. Da taho ž vykarystańnie chicinu z much dazvolić paźbiehnuć aściaroh z nahody alerhii na niekatoryja morapradukty.
Z praduktaŭ ad much kamanda stvaryła hidrahiel, jaki moža pahłynać u 47 razoŭ bolšuju kolkaść vady za svaju vahu ŭsiaho za adnu chvilinu. Hety pradukt možna ŭnosić u hlebu sielskahaspadarčych paloŭ, kab utrymlivać pavodkavyja vody, a zatym pavolna vydzialać vilhać padčas zasuchi.
Navukoŭcy spadziajucca, što nieŭzabavie jany zmohuć stvarać z much bijapłastyk, jaki nie budzie sadziejničać zabrudžvańniu ziamli.
Čytajcie jašče:
Jak vyhnać drazafiłaŭ? Voś jakoha pachu jany bajacca
Niebiaśpiečniejšyja, čym zdajucca: navukoŭcy patłumačyli, čamu treba bajacca zvyčajnych much
U Francyi mužčyna zrujnavaŭ častku doma, kab zabić nadakučlivuju muchu
Kamientary