Litoŭskija mytniki zatrymali na miažy amal miljon pačkaŭ kantrabandnych biełaruskich cyharet
Mytniki ź Litvy 20 žniŭnia na punkcie propusku «Rajhard» (ź biełaruskaha boku «Pryvałka») vyjavili vielmi bujnuju partyju kantrabandnych cyharet. U mašynie pieravozili amal miljon pačkaŭ.
Hramadzianin Biełarusi, jakoha nadhladali mytniki, zajaviŭ, što viazie ŭ hruzaviku poliefirnaje vałakno. Ale mašynu pravieryli renthienam i vyjavili, što za niekalkimi pakunkami vałakna pieravoziacca cyharety biełaruskaj vytvorčaści — 967 tysiač pačkaŭ Minsk, NZ, Queen, Dove, Fest i inšyja. Košt kantrabandnaj partyi acanili ŭ 3,99 młn jeŭra.
Kiroŭcu hruzavika Daf zatrymali na dva dni, ale adpuścili pad zastavu 15 tysiač jeŭra. Adnosna jaho raspačali dasudovaje rasśledavańnie.
Litoŭskija mytniki rasceńvajuć hety i inšy vypadki, jakija apošnim časam pačaścilisia, jak śviedčańnie peŭnaha adčaju kantrabandystaŭ: jany cyharet užo amal nie chavajuć i ryzyku pad uvahu nie biaruć, a prosta spadziajucca, što mytniki nie stanuć praviarać kožny hruzavik.
Kali raniej takija bujnyja partyi łavili niekalki razoŭ na hod, to ciapier — ci nie kožny miesiac, pišuć litoŭskija mytniki. Akramia taho, raniej kantrabanda była kudy bolš kreatyŭnaja i vynachodlivaja.
Ciapier čytajuć
«Siadzieŭ užo 50 sutak, zatrymali jaho dziaŭčynu i brata». Sukamiernik raskazaŭ pra radyjoamatara, aryštavanaha za zdradu dziaržavie2
Kamientary