Biełarus z dapamohaj niejrasietki zrabiŭ Star Wars z sałomy
Biełaruski hrafičny dyzajnier i ilustratar Loša Limonaŭ u svaich sacsietkach pakazaŭ sieryju art-abjektaŭ Star Wars z sałomy. Dyzajnier zhienieravaŭ ich z dapamohaj niejrasietki, ale zadumvajecca nad tym, kab zrabić ź ich realnyja sałamianyja skulptury, piša CityDog.io.
Jak raskazaŭ sam Limonaŭ u kamientary CityDog.io, ideja zrabić niešta ŭ styli biełaruskaha sałomaplacieńnia była ŭ jaho daŭno.
«Ja prymiaraŭ roznyja vobrazy, ale nijak nie dachodzili ruki. I voś niadaŭna hulaŭ pa Nacyjanalnym mastackim muziei, znoŭ sustreŭ tam plecienyja ekspanaty — i adbyłosia azareńnie. Taksama za dzień da hetaha ja naviedaŭ «Asieńni sałon», dzie mnie mała što spadabałasia. U vyniku hetaha napłastavańnia padziej ja vyrašyŭ stvaryć pop-art-kalekcyju ličbavych «sałamianych «Zornych vojnaŭ».
Pa słovach dyzajniera, sučasnaje pop-art-mastactva — heta praces pastajannaj pierapracoŭki, transfarmacyi, kapijavańnia elemientaŭ masavaj kultury dla taho, kab stvaryć novyja emocyi, novyja vobrazy i sensy.
«Vobraz Darta Vejdera źjaviŭsia adrazu, bo jaho šlem nahadaŭ plecieny košyk — i paniesłasia! — dzielicca Loša. — Ja pasprabavaŭ pieraasensavać vydatnuju samabytnuju nacyjanalnuju techniku i stvaryć sieryju novych vobrazaŭ».
Kalekcyja ličbavych «sałamianych «Zornych vojnaŭ» zhienieravanaja z dapamohaj niejrasietki, ale dyzajnier nie vyklučaje taho, što art-abjekty mohuć stać realnymi skulpturami.
«U płanach hety kancept hłabalna maštabavać. Jašče treba šmat čaho vyvučyć u historyi našaj kultury, razabrać roznyja pryjomy sałomaplacieńnia. Taksama jość vielmi šmat jarkich vobrazaŭ u pop-kultury, jakija možna pieraasensavać u hetym styli».
Ličbavyja skulptury Loša płanuje pieravieści ŭ materyjał z dapamohaj 3D-pryntara ci navat samastojna spleści rukami.
«Mnie zdajecca, što takija jarkija ekspanaty vykličuć šmat emocyj na tym ža «Asieńnim sałonie — 2024», jak minimum».
Ciapier čytajuć
Stała viadoma, što za 200 tysiač jeŭra prapanoŭvali Siarhieju Cichanoŭskamu «biełaruskija biznesmieny»29
Kamientary