U kastryčniku ŭ Chryścijanskim sacyjalnym centry vystaŭlena dla ahladu ŭnikalnaja kalekcyja abrazoŭ «Niabiesnaja varta Biełarusi».
U ekspazicyi pradstaŭleny abrazy, pierad jakimi bolš za sotniu hadoŭ źviartalisia da Boha z samymi patajemnymi dumkami i prośbami našyja prodki.
Na abrazach vyjavy Chrysta, Panny Maryi, śviatoha Mikałaja i śviatoha Juryja.
Heta niabiesnaje vojska, na jakoje va ŭsie časy spadziavaŭsia biełaruski narod. Abliččy śviatych hladziać ź lištvaŭ (mastacki elemient vonkavaha azdableńnia sialanskaj chaty), niby z voknaŭ biełaruskich chat, piša Catholic.by.
Lištvy pachodziać z Homiela i ź vioski Kudryčy Pinskaha rajona. Apošniaja miaścina znachodzicca ŭsiaho ŭ dziasiatku kiłamietraŭ ad adnaho z histaryčnych centraŭ dziejnaści na Paleśsi siaścior uršulanak — vioski Haradzišča.
Tamu raźmiaščeńnie lištvaŭ u Chryścijanskim sacyjalnym centry, jakim apiakujucca siostry ŭršulanki, źjaŭlajecca simvaličnym. U starych kufrach, jakija pieratvarylisia ŭ muziejnyja vitryny, raźmieščany materyjały pa historyi dziejnaści ŭršulanak na biełaruskich ziemlach.
Piarlinaj vystaŭlenaj u centry kalekcyi źjaŭlajecca ŭnikalny chramavy abraz XVIII stahodździa z Kobrynskaha rajona, jaki ŭ savieckija časy niekalki dziesiacihodździaŭ vykarystoŭvaŭsia ŭ jakaści doški ŭ ścianie zvyčajnaj chaty. Z Dobrušskaha rajona pachodzić abraz Panny Maryi ź niemaŭlatkam Jezusam i Janam Chryścicielem — svojeasablivaja narodnaja kopija słavutaha tvora Rafaela Madonna della sedia — «Madonna na kreśle».
Cikavaść pradstaŭlaje i abraz Trajeručycy Panny Maryi z Chrystom ź vioski Chalč Vietkaŭskaha rajona. Na ikonie vidać raniejšy malunak abraza śviatoha Mikałaja: pad bolš poźnim žyvapisam prahladajecca abłačeńnie słavutaha biskupa. Cikavymi abrazami źjaŭlajucca taksama «Nieapalimaja Kupina», śviataja Barbara, prarok Illa, karanavańnie Dzievy Maryi i mnohija inšyja.
Možna śćviardžać, što abrazy i lištvy — uratavanaja spadčyna. Tvory znachodzilisia ŭ kiepskim stanie, adnak praviedzienyja kansiervacyja i restaŭracyja dazvolili viarnuć i padkreślić pryhažość tvoraŭ biełaruskaha mastactva.
Ekspazicyja azdoblena narodnymi ručnikami, jakija pachodziać z roznych miaścin Biełarusi.
Arhanizatary kulturnaj imprezy zaprašajuć usich achvotnych naviedać ekspazicyju, dzie možna pačuć cikavy apovied pra ŭnikalnyja rarytety ad viadučaha navukovaha supracoŭnika Misii Dobraha Samaranina pad apiekaj śviatoj Uršuli Leduchoŭskaj, kuratara ekspazicyi Paŭła Karalova. Naviedvalniki zmohuć dałučycca i da spravy stvareńnia rukapisnaj Biblii.
Dadatkovaja infarmacyja i zapis:
- +375 (17) 343 99 17
- +375 (44) 770 09 01 — Recepcyja
e-mail: [email protected]
Adras: h. Minsk, Chryścijanski sacyjalny centr, vuł. Sierafimoviča, 19.
Kamientary