Nacyjanalnaja biblijateka nabyła pieršy paetyčny pierakład Psałtyra na carkoŭnasłavianskuju movu
Vydańnie vyjšła ŭ śviet u Maskvie ŭ drukarni, jakuju arhanizavaŭ Simiaon Połacki.
Napiaredadni jubileju z dnia naradžeńnia carkoŭnaha, dziaržaŭnaha i kulturnaha dziejača i Simiaona Połackaha (1629—1680) Nacyjanalnaja biblijateka Biełarusi nabyła redki ekzemplar «Psałtiri rifmotvornoj», nadrukavanaj u 1680 hodzie, piša «Budźma».
Vydańnie vyjšła ŭ śviet u Maskvie, u Vierchniaj drukarni, jakuju arhanizavaŭ Simiaon Połacki.
Psałtyr — adna z hałoŭnych navučalnych i bohasłužbovych knih, a taksama adzin ź pieršych biblejskich tekstaŭ, pierakładzienych na słavianskuju movu. Simiaon Połacki pieršym ažyćciaviŭ poŭny pierakład hetaj biblejskaj knihi siłabičnym vieršam.
Vydańnie ŭklučaje try pradmovy aŭtara, sam tekst «Psałtiri rifmotvornoj», a taksama starazapavietnyja «pieśni», «malitvy» i «Miesiaciesłov» u vieršavanym pierakładańni. Pradmovy Simiaona Połackaha źviernuty da cara Fieadora Alaksiejeviča i nabožnych čytačoŭ, adna z pradmoŭ napisana taksama ŭ vieršavanaj formie.
Na adnoj sa staronak Simiaon Połacki ŭpieršyniu ŭ Rasii vykarystaŭ «drukarskuju hulniu»: pačaŭ nabor frazy «Psałmy pojtie Bohu našiemu» z centra nabornaj pałasy, tak što frazu možna čytać i źleva naprava, i sprava naleva, i źnizu ŭvierch, i źvierchu ŭniz.
Kniha bahata ŭpryhožana zastaŭkami, kancoŭkami, łambardami, nabornymi ŭpryhažeńniami. Uklučaje hraviuru cara Davida ŭ vykanańni viadomaha ikanapisca Simona Ušakova. Vyjava stała navatarskaj dla svajho času. Vobraz cara Davida vykanany realistyčna, traktoŭka zadniaha płana hraviury vyrašana prastorava i ŭ pierśpiektyvie.
Na palach knihi jość rukapisnyja notnyja radki. Pakłaŭ vieršy na muzyku ŭ 1685 hodzie hasudaraŭ pieŭčy dziak, kampazitar Vasil Citoŭ (kala 1650 — 1710).
Jak adznačaŭ Simiaon Połacki, kniha pryznačałasia nie dla carkoŭna-bohasłužbovaha ŭžyvańnia, a dla «chatniaj patreby» čytača, jaki šanuje «ryfmatvornuju havorku».
«Psałtiŕ rifmotvornaja» źjaŭlajecca pomnikam knižnaj kultury XVII stahodździa i ŭjaŭlaje vialikuju cikavaść dla daśledčykaŭ.
Ciapier čytajuć
Ejsmant: Łukašenka nie zmoža palacieć na Samit miru ŭ ZŠA, bo pavietranaja prastora Jeŭropy dla jaho zakrytaja50
Kamientary