Na vybarach na Tajvani lidziruje samy niepryjemny dla Kitaja kandydat
U subotu žychary Tajvania prahałasavali na prezidenckich vybarach. Ludzi pačali zajmać čerhi la vybarčych učastkaŭ jašče da ich adkryćcia. Pavodle papiarednich źviestak, jaŭka vielmi vysokaja.
Favarytam honki źjaŭlajecca kandydat ad kiroŭnaj partyi 64-hadovy Uiljam Łaj (abo Łaj Cynde), jakoha ŭłady macierykovaha Kitaja nazyvajuć sieparatystam, piša Bi-bi-si.
U vypadku pieramohi jon maje namier skaracić ekanamičnuju zaležnaść ad Piekina i praciahnuć umacoŭvać adnosiny z ZŠA.
Jaho hałoŭny apanient — kandydat ad apazicyjnaj partyi Hamińdan Chou Jui, naadvarot, vystupaje za zbližeńnie z macierykovym Kitajem.
Pavodle pramiežkavych danych padliku hałasoŭ, Łaj apiaredžvaje Chou na niekalki pracentnych punktaŭ. Na hety momant Łaj nabraŭ 37%, u kandydata ad apazicyi — 34%.
Heta čakany raskład. Roznyja vybarčyja apytańni prahnazavali ščylnuju honku ź nievialikaj, ale ŭpeŭnienaj pieravahaj Uiljama Łaja.
Taksama ŭpieršyniu ŭ historyi palityki Tajvania vyklik dvum hałoŭnym partyjam kinuŭ kandydat ad treciaj — vielmi papularnaj siarod moładzi. Jon pakazvaje lepšy vynik, čym čakałasia, ale nie składaje surjoznaj kankurencyi.
Kančatkovyja vyniki hałasavańnia pavinny stać jasnyja da kanca dnia suboty, adnak aficyjnyja vyniki buduć padviedzieny praź niekalki dzion.
Za vybarami na Tajvani naziraje ŭvieś śviet, bo Piekin pahražaje vostravu vajnoj u vypadku, kali pa ich vynikach tajvancy zachočuć abviaścić ab farmalnaj niezaležnaści ad Kitaja.
Napiaredadni vybaraŭ kitajskija ŭzbrojenyja siły značna pavysili aktyŭnaść vakoł Tajvania.
Tajvańskaje Ministerstva abarony zajaŭlaje, što ŭ pavietry vakoł vostrava kursirujuć vosiem kitajskich vajskovych samalotaŭ, adzin ź jakich parušyŭ pavietranuju prastoru z paŭdniova-zachodniaha boku a šostaj ranicy pavodle miascovaha času — niezadoŭha da adkryćcia vybarčych učastkaŭ.
Taksama ŭ subotniaj zajavie Minabarony Tajvania havorycca, što šeść kitajskich vajskovych karabloŭ uziali vostraŭ u koła.
«Uzbrojenyja siły [Tajvania] sočać za situacyjaj. Bajavym pavietranym patrulam, karablam VMF i naziemnym rakietnym sistemam daručana reahavać na varožyja dziejańni ŭ vypadku nieabchodnaści», — zajaviła vajennaje viedamstva Tajvania.
Raniej ZŠA nie raz zajaŭlali, što ŭmiašajucca ŭ situacyju ŭ rehijonie ŭ vypadku vajennaj ahresii z boku Piekina.
Ciapier čytajuć
U biełarusaŭ Polščy byli pryčyny nie hałasavać za Tšaskoŭskaha30
Kamientary