U minułym hodzie bolš za tysiaču biełarusaŭ učynili złačynstvy ŭ Polščy
U 2023 hodzie złačynstvy ŭ Polščy ździejśnili 17 278 inšaziemcaŭ — na 2,4 tys. bolš, čym u papiarednim, paviedamiła 25 studzienia vydańnie Rzeczpospolita.
Pavodle infarmacyi vydańnia, za dziesiać hadoŭ kolkaść złačynstvaŭ, učynienych inšaziemcami, pavialičyłasia ŭ Polščy ŭ piać razoŭ (z 3,5 tys. u 2013 hodzie).
Čaściej za ŭsio ŭ 2023 hodzie zakon parušali ŭkraincy (jany składajuć bolš za pałovu zamiežnikaŭ, jakim pradjaŭlena abvinavačvańnie). Dalej, pavodle infarmacyi Rzeczpospolita, iduć hruziny (2 714) i biełarusy (1 030), za imi — małdavanie i rasijanie.
Vydańnie adznačaje ŭzrosłuju kolkaść vypadkaŭ parušeńnia sudovych zabaronaŭ, jakija čaściej za ŭsio nakładajucca za kiravańnie ŭ niećviarozym vyhladzie, i pryvodzić u hetaj suviazi dva pravaparušeńni, učynienyja biełaruskimi hramadzianami.
Tak, u Hdańsku za rulom byŭ zatrymany niećviarozy biełarus, jaki mieŭ zabaronu na kiravańnie da sakavika 2026 hoda, jaki jechaŭ «pa ŭsioj šyryni darohi». 22-hadovy mužčyna, jaki žyvie ŭ Hdyni, parušyŭ dźvie padobnyja zabarony, sieŭšy za rul paśla pryjomu amfietaminaŭ, a praź niekalki miesiacaŭ «prasłaviŭsia tym, što rasstralaŭ ź pnieŭmatyčnaha pistaleta inšuju mašynu, budučy pasažyram, bo jana jaho abahnała».
Pavodle danych Upraŭleńnia pa spravach inšaziemcaŭ Polščy, pa stanie na 31 śniežnia 2023 hoda ŭ krainie pražyvała 118 562 hramadzianina Biełarusi, jakija majuć sapraŭdny dakumient, vydadzieny ŭ Polščy i jaki daje prava na znachodžańnie na terytoryi krainy. 30 červienia 2023 hoda padobnyja dakumienty mieła 91 tys. hramadzian Biełarusi, u žniŭni 2020 hoda — 28 tys.
Kamientary