U Rasii pačali zatrymlivać udzielnikaŭ pachavańnia Navalnaha. Ich vyličvajuć pa videakamierach
Paśla pachavańnia Alaksieja Navalnaha siłaviki pačali pieraśledavać ludziej, jakija prychodzili raźvitacca z palitykam.
Pieršaj zatrymanaj stała žycharka Maskvy, paviedamiŭ kanał «OVD-Info». Jana trapiła na videa, na jakim hučała fraza «Hierojam słava». Siłaviki prychodzili da jaje dadomu jašče 1 sakavika, ale jana była za horadam, tamu zatrymali jaje tolki paśla viartańnia 3 sakavika. Žančyna praviała noč u adździele palicyi, jaje aštrafavali na paŭtary tysiačy rasijskich rubloŭ (kala 55 biełaruskich) pa artykule ab demanstracyi zabaronienaj simvoliki (č.1 art. 20.3 KaAP).
Ranicaj u aŭtorak, 5 sakavika, palicyjanty zatrymali jašče adnaho žychara Maskvy Jahora Komleva na vychadzie z domu. Jaho pavieźli ŭ adździeł palicyi, sfatahrafavali i zabrali pašpart. Nieviadoma, jaki artykuł jamu staviać u vinu.
Taksama ŭ aŭtorak supracoŭniki Centra pa supraćdziejańni ekstremizmu zatrymali žycharku Maskvy Alenu Hrybkovu. Jana naviedvała pachavańnie Navalnaha 1 sakavika. Artykuł, jaki joj staviać u vinu, taksama nieviadomy.
Jak raspavioŭ «Ahientstvu» pres-sakratar «OVD-Info» Dźmitryj Anisimaŭ, pra tendencyi kazać jašče rana, adnak jašče ŭ dzień pachavańnia prajekt papiaredžvaŭ, što zatrymańniami niepasredna na akcyi, vierahodna, pieraśled udzielnikaŭ nie abmiažujecca. Anisimaŭ adznačyŭ, što
sistema raspaznańnia asob u Maskvie «daje mahčymaść prasačyć šlach kožnaha čałavieka naŭprost da jaho padjezda».
Usiaho ŭ dzień raźvitańnia z Navalnym u haradach Rasii zatrymali 113 čałaviek. U Maskvie zatrymali tolki 17 čałaviek.
Kamientary