Mazyrski NPZ paŭhoda tamu zapuściŭ francuzskuju ŭstanoŭku. Ciapier šukaje śpiecyjalistaŭ, jakija b navučyli na joj pracavać
Mazyrski naftapierapracoŭčy zavod abjaviŭ adkryty konkurs na pošuk śpiecyjalistaŭ dla absłuhoŭvańnia technałahičnych siekcyj ustanoŭki hidrakrekinhu ciažkich naftavych astatkaŭ. Hetaja ŭstanoŭka koštam 1,5 miljarda dołaraŭ była zapuščana paŭhoda tamu, ale stała samaj avaryjnaj na zavodzie — jak minimum piać razoŭ ŚMI paviedamlali ab nadzvyčajnych zdareńniach na joj, piša «Fłahštok».
Z dakumientacyi papiaredniaha tendaru, jaki nie adbyŭsia, stała viadoma ab hałoŭnych prablemach darahoj ustanoŭki. Heta, u pryvatnaści, adsutnaść štata śpiecyjalistaŭ, jakija mohuć vieści supravadžeńnie i kansultavańnie, źviazanyja z ekspłuatacyjaj ustanoŭki pa technałohii H-Oil.
Sprava ŭ tym, što jana asnaščana licenzijnym abstalavańniem francuzskaj kampanii Axens — a va ŭmovach nakładzienych na pradpryjemstva sankcyj jano nie moža pryciahnuć da supracoŭnictva jeŭrapiejskich śpiecyjalistaŭ.
U novym tendary paznačana suma, jakuju Mazyrski NPZ hatovy addać z ułasnych srodkaŭ za pracu śpiecyjalistaŭ, jakija navučyli b karystacca ŭstanoŭkaj hidrakrekinhu. Jana składaje amal 1,9 młn jeŭra.
Pa ŭmovach konkursu, na praciahu hoda śpiecyjalisty, jakija majuć adpaviedny vopyt, pavinny prysutničać na abjekcie i zabiaśpiečvać štosutačnaje kansultavańnie technałahičnaha piersanału pradpryjemstva, vydavać rekamiendacyi pry viadzieńni technałahičnaha režymu, praviadzieńni puskavych apieracyj, spynieńni asobnaha abstalavańnia abo ŭsioj ustanoŭki.
Adznačajecca, što ŭsie spravazdačy i rekamiendacyi, jakija vydajucca śpiecyjalistami, pavinny być pradstaŭleny na ruskaj movie.
Na Mazyrskim NPZ čakajuć, što śpiecyjalisty zmohuć pačać pracu na pradpryjemstvie z 1 červienia.
Ciapier čytajuć
Bieśpiłotnik, jaki ŭpaŭ u Minsku, prylacieŭ z boku Barysava — šmatlikija śviedčańni9
Kamientary