Va Uździenskim rajonie dačnikaŭ druhi hod teraryzuje zhraja badziažnych sabak. Čynoŭniki ničoha zrabić nie mohuć
Kažuć, sadovyja tavarystvy pavinny adłoŭlivać ich za svoj košt.
Zhraja dzikich sabak užo druhi hod teraryzuje dačnikaŭ z sadovych tavarystvaŭ va Uździenskim rajonie. Sabak sabrałasia ŭžo bolš za 20. Vonkava i paasobku jany nie vyhladajuć žachliva. Adnak, kali źbirajucca ŭ zhrai, stanoviacca niebiaśpiečnyja dla navakolnych, raspaviadaje ANT.
Sabaki źjaŭlajucca nočču i ranicaj. Jany robiać padkopy, psujuć hradki, napadajuć na chatnich sabak.
Adnojčy navat napali na mužčynu, ciapier jon adnaŭlajecca. Byŭ vypadak ahresii ŭ dačynieńni da dziciaci: na ščaście, paśpieŭ uciačy, kinuŭšy rovar.
Dniom sabaki, miarkujučy pa ŭsim, uciakajuć u les, dzie čakajuć da viečara.
Miascovyja ličać, što zhraja stvaryłasia paśla taho, jak paru hadoŭ tamu chtości pryvioz ščaniukoŭ i vypuściŭ na volu. Dačniki padkormlivali sabak, ale nie pryručyli.
Bolš za 60 čałaviek ź miascovych sadovych tavarystvaŭ arhanizavali inicyjatyŭnuju hrupu. Dačniki napisali listy va ŭsie Uździenskija vykankamy, rajsaviety, ŽKH, centr hihijeny i RUUS.
Čynoŭniki za patencyjny adłoŭ vystavili dačnikam niepadjomnuju dla piensijanieraŭ sumu. Pry hetym harantyj adłovu ŭsioj zhrai nichto dać nie moža.
Staršynia Dziaščanskaha sielsavieta Uładzimir Bałciankoŭ patłumačyŭ, što sadovyja tavarystvy — adasoblenyja jurydyčnyja adzinki. I zajmacca adłovam jany pavinny za svoj košt.
«Na terytoryi našaha sielsavieta znachodzicca 20 sadovych tavarystvaŭ. Kožnaje ź ich — adasoblenaja jurydyčnaja adzinka, tamu adłovam badziažnych sabak na terytoryi nasielenych punktaŭ zajmajecca sielski saviet (my vystupajem zakazčykami, pracy vykonvaje Uździenskaja ŽKH), a sadovyja tavarystvy adłoŭ sabak, jak i inšaje dobraŭparadkavańnie, robiać za košt svaich unioskaŭ», — adznačyŭ Bałciankoŭ.
Juryskonsult Uździenskaha ŽKH Hienadź Paźniak prytrymlivajecca taho ž mierkavańnia.
«Pa zvarocie sadovych tavarystvaŭ Uździenskaha rajona my pravamierna admovili im u akazańni pasłuhi pa adłovie, bo heta nie naša śfiera. Jany znachodziacca ŭ zonie adkaznaści ŭ pieršuju čarhu staršyni i samich žycharoŭ», — adznačyŭ Paźniak.
Dačniki pry hetym nie ŭpeŭnienyja, što zmohuć sabrać takuju sumu praz unioski.
Kamientary