Čamu Bajden vyrašyŭ vyjści z honki? Voś što pra heta pišuć suśvietnyja miedyja

Vialiki artykuł pa hetaj temie vypuściŭ Time. Žurnalisty vydańnia ličać, što vychadu Bajdena z honki paspryjali abstaviny — jak abjektyŭnyja, hetak i subjektyŭnyja.

Aŭtary ličać, što Bajden byŭ pierakanany ŭ tym, što zdolny da supraćstajańnia. Pa mierkavańni aŭtaraŭ, sam Džo ličyŭ, što zdolny pieramahčy Trampa.

Ale zdarylisia dźvie rečy. Spačatku zamach na Trampa, jaki ŭmacavaŭ jaho pazicyi.

Paśla Bajden zachvareŭ na kavid i byŭ zmušany ŭziać adpačynak, kab ačuniać. Tam jon skardziŭsia na prablemy z donarami, złavaŭsia na toje, što jaho nie pavažajuć byłyja paplečniki i siabry, aburaŭsia niepavahaj da jaho dasiahnieńniaŭ. Ale, jak kažuć aŭtary, usie viedali, što jon usurjoz abdumvaŭ sychod.

Pa mierkavańni aŭtaraŭ, hety dźvie akaličnaści paŭpłyvali na vybar Bajdena najbolš, bo navat demakraty pierastali chavać, što jon musiŭ vyjści z honki.

Trochu inšaha pierakanańnia prytrymlivajucca aŭtary Politico. Pa źviestkach aŭtaraŭ, Bajden pryniaŭ rašeńnie ŭ samy apošni momant. Paru dzion tamu jon byŭ jašče peŭny ŭ tym, što budzie ŭdzielničać u honcy.

Styŭ Rykieci pryjechaŭ da Bajdena ŭ piatnicu, kali toj uziaŭ adpačynak pa chvarobie ŭ svajoj rezidencyi. Majk Doniłan pryjechaŭ na nastupny dzień. Pa źviestkach vydańnia, heta ludzi, jakim Bajden daviaraje i jakija byli ź im, kali jon vyrašaŭsia być prezidentam u 2016 i 2020 hadach.

Pa źviestkach Politico, akramia prablemaŭ z donarami i zboram srodkaŭ, jany pakazali jamu apytańni. Jany ŭrazili Bajdena — vyhladała tak, što šlach da pieramohi, jaki vymaloŭvaŭsia ź listapada, byŭ stračany.

Pa źviestkach vydańnia, paśla taho, jak Bajden uśviadomiŭ, što ŭ jaho nie vierać navat byłyja paplečniki i vybarščyki ź liku demakrataŭ, jon vyrašyŭ źniacca z honki. 

Učora ŭ 13:45 jon paviedamiŭ svajoj pracoŭnaj hrupie, što nie budzie bałatavacca i padziakavaŭ im za pracu. A nieŭzabavie napisaŭ, što zdymajecca.

Heta, pa mierkavańni aŭtaraŭ, dazvoliła jamu zachavać tvar i vyjści z honki na jahonych umovach — projhryš kaštavaŭ by jamu vielmi doraha.

Adrazu paśla vychadu z honki na Bajdena pasypalisia chvalebnyja vodhuki zamiest niehatyvu, jaki demakraty adkryta vykazvali raniej.

«Choć ja chacieŭ damahčysia pieraabrańnia, ja liču, što ŭ intaresach majoj partyi i krainy syści ŭ adstaŭku i zasiarodzicca na vykanańni svaich abaviazkaŭ prezidenta da kanca terminu», — padsumavaŭ svoj vychad z honki Džo Bajden.

• 16
• 0
• 3
• 0
• 0
• 2
• 0
• 0