Sud admoviŭsia razhladać pazoŭ siamji Łapickich da harvykankama Žodzina
Sudździa žodzinskaha sudu Taćciana Traciuk admoviłasia pryniać da razhladu pazoŭ Śviatłany i Alaksieja Łapickich da haradzkoha vykanaŭčaha kamitetu Žodzina.
Łapickija sprabavali abskardzić rašeńnie harvykankamu, jaki ŭ žniŭni 2009 hodu zakryŭ adzinuju biełaruskamoŭnuju klasu ŭ himnazii №1, dzie navučaŭsia ich syn Janka. Z hetaj pryčyny 14‑hadovy Janka Łapicki ŭ hetym navučalnym hodzie vymušany zajmacca samastojna ŭ chatnich umovach. Sudździa Taćciana Traciuk zajaviła, što minuŭ termin daŭniny na abskardžvańnie rašeńnia haradzkich uładaŭ, ale Łapickija dakumentalna zaśviedčyli, što ŭ vyniku stresaŭ i zachvorvańniaŭ, a taksama pachodaŭ pa inšych instancyjach nia zdoleli źviarnucca ŭ sud raniej. Tym nia mienš było vyniesiena rašeńnie admović u razhladzie pazovu.
Śviatłana i Alaksiej Łapickija namieranyja abskardzić siońniašniaje rašeńnie haradzkoha suda Žodzina ŭ Mienskim abłasnym sudzie. Jany taksama źviarnulisia ŭ Heneralnuju prakuratu i da ministra adukacyi Alaksandra Radźkova z zajavaj ab biaździejnaści miascovych uładaŭ, jakija nie zabiaśpiečyli ŭmovy dla navučańnia ich syna.
Alaksiej i Śviatłana Łapickija zmahajucca za biełaruskamoŭnaje navučańnie svajho syna Janki ad momantu jahonaha pastupleńnia ŭ himnaziju №1 u 2002 hodzie. Administracyja škoły i haradzkija ŭłady admaŭlalisia adkryvać klasu ź biełaruskaj mova navučańnia, nibyta, ź mierkavańnia ekanomii srodkaŭ. Paśla strajku i navučańnia doma ŭ 2004 hodzie jurydyčnyja mahčymaści dla biełaruskamoŭnaha navučańnia byli stvoranyja, ale nie vykonvalisia praktyčna. A ŭ sioletnim navučalnym hodzie harvykankam Žodzina skasavaŭ i jurydyčnyja ŭmovy dla biełaruskamoŭnaj adukacyi, skasavaŭšy adzinuju biełaruskamoŭnuju klasu ŭ himnazii №1. Śviatłana i Alaksiej Łapickija miarkujuć, što heta źviazana ź ich palityčnaj i hramadzkaj dziejnaściu: jany źjaŭlajucca aktyvistami partyi BNF, pravaabarončaha centru «Viasna» i nieadnojčy brali ŭdzieł u vybarach roznych uzroŭniaŭ.
Ciapier čytajuć
Advakat Dźmitryj Lepretar raskazaŭ pra biełyja plamy ŭ spravie ab terakcie ŭ mietro9
Kamientary