Mihracyjnaja słužba Narviehii admoviłasia vydavać prajazny dakumient inšaziemca traim studentam ź Biełarusi
Dyrekcyja pa pytańniach imihracyi (UDI) Narviehii admoviłasia vydavać tak zvanyja narviežskija pašparty dla inšaziemcaŭ studentam — uciekačam ź Biełarusi. Na dumku Chielsinkskaha kamiteta, heta aburalna, piša miascovaje vydańnie VG.no. Na publikacyju źviarnuła ŭvahu «Lusterka».
Paviedamlajecca, što UDI admoviła ŭ vydačy prajaznych dakumientaŭ trom studentam ź Biełarusi, jakija ŭciakli ad pieraśledu. Adzin ź ich, 24-hadovy Vital, raskazaŭ, što apynuŭsia ŭ Narviehii, tamu što bajaŭsia za svajo žyćcio. Pavodle jaho słoŭ, jon pieražyŭ šmat źnievažalnych dopytaŭ, aryštaŭ, pieratrusaŭ i pahroz z boku KDB na radzimie paśla ŭdziełu ŭ pratestach u 2020 hodzie.
U 2022 hodzie Vital uciok u Hruziju, a paśla pryjechaŭ u Narviehiju praz prahramu «Studenty pad ryzykaj».
«Termin dziejańnia jaho pašparta chutka skončycca, i strach viartańnia na radzimu znoŭ uźnikaje. Režym Łukašenki patrabuje, kab biełarusy viartalisia na radzimu dla atrymańnia novaha pašparta. Narviehija mahła b dapamahčy, vydaŭšy tak zvany narviežski dakumient dla inšaziemcaŭ, kali vykonvajucca peŭnyja ŭmovy. Ale Vitalu admovili ŭ jaho zajaŭcy», — piša vydańnie.
«Ja nie moh u heta pavieryć i dumaŭ, što adbyłasia pamyłka. Ja adčuvaŭ siabie zusim biezdapamožnym, nie zdolnym paŭpłyvać na svaju situacyju», — skazaŭ student.
Pavodle źviestak VG, dakumienty taksama nie vydali 20-hadovaj Hańnie (imia źmieniena) i Mikitu, jakija pryjechali ŭ Narviehiju pa pracoŭnaj vizie. Abodva ŭdzielničali ŭ pratestach i achviaravali hrošy na roznyja inicyjatyvy. Ich baćkoŭ aryštoŭvali.
U svaim adkazie UDI adznačyła, što
«niedastatkova dokazaŭ abo małaimavierna, što zajaŭniki sprabavali atrymać prajaznyja dakumienty na radzimie abo što ŭ ich jość asablivyja padstavy dla atrymańnia zamiežnaha pašparta».
Na pytańnie vydańnia ab tym, čamu sistema praciahvaje prymušać biełarusaŭ u vyhnańni viartacca na radzimu dla atrymańnia dakumientaŭ, viedamstva adkazała:
«UDI kirujecca praviłami, ustalavanymi palitykami. Kali patrebnyja źmieny, jany pavinny zychodzić ad palityčnaj ułady. Kali ŭ hetych ludziej jość dazvoł na žycharstva, jany pavinny spačatku pasprabavać atrymać prajaznyja dakumienty ŭ svajoj krainie abo pradstavić važkija padstavy dla atrymańnia zamiežnaha pašparta».
Hienieralny sakratar Chielsinkskaha kamiteta Beryt Lindeman ličyć, što hetyja studenty — tolki prykład taho, što ciapierašniaja praktyka nie pracuje.
«Heta sapraŭdy aburalna, tamu što viartańnie ŭ Biełaruś dla hetych ludziej vielmi niebiaśpiečnaje. Heta nie toje, što možna «pravieryć», — skazała Lindemann VG.
Pavodle jaje słoŭ, novaja taktyka narviežskich uład — masava admaŭlać u zajaŭkach:
«Jany nie ŭličvajuć vielmi śpiecyfičnuju situacyju, u jakoj znachodziacca ludzi. U vyniku tyja mohuć zastacca biez dakumientaŭ».
«My bačym, što inšyja krainy vyrašajuć hetuju prablemu, ale Narviehija — nie», — padsumavała Lindeman.
Rada Jeŭropy zaklikała spraścić vizavy režym dla biełarusaŭ i nie patrabavać apastyli na dakumientach
«Advakatka prosta ašaleła». Biełarusy pa-za šenhien-zonaj, u jakich chutka skončycca pašpart — pra svoj płan dziejańniaŭ
Franak Viačorka prakamientavaŭ spravu departavanych sa Šviecyi biełarusaŭ
«Padumała, što mianie departujuć u Biełaruś». Jak biełaruska padarožničaje pa ES z ženieŭskim pašpartam i dzie ŭ jaje ŭźnikli prablemy
Biełarusku ŭ Polščy nie puścili na bort Ryanair z prajaznym dakumientam. Ale jana zmahła damahčysia kampiensacyi
Ciapier čytajuć
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1212
Kamientary