U Rasii nazirajucca prablemy z masłam 

U apošnija tydni z roznych rehijonaŭ Rasii prychodzić infarmacyja pra rost cenaŭ i deficyt masła. Pastaŭščyki, prytym jak bujnyja vytvorcy, tak i bolš drobnyja, skaračajuć vytvorčaść i adhruzki jaho ŭ handlovyja sietki.

Hałoŭnaja pryčyna — imklivy rost cenaŭ na syravinu. Jak pišuć «Iźviestija», u pieršym paŭhodździ rost cenaŭ na małako skłaŭ 39%, a za 8 miesiacaŭ hetaha hoda — 46% u paraŭnańni ź minułym hodam.

U vyniku aptovyja zakupačnyja ceny na hety vid pradukcyi vyraśli za dzieviać miesiacaŭ amal na 31%. Ale handlovyja sietki vymušanyja trymać ceny nižejšymi za rynačnyja. Tak, za dzieviać miesiacaŭ ceny na masła ŭ mahazinach vyraśli na 18%. Pry hetym rost tolki za dva apošnija miesiacy skłaŭ prykładna 8%. Za vierasień u hadavym vyražeńni tempy rostu cany masła bolš čym u dva razy apiaredzili rost cen na małočnuju pradukcyju ŭ cełym.

Kali rost cen na masła, jak sacyjalna značny tavar pieršaj nieabchodnaści, praciahniecca i za 60 dzion pieravysić 10%, to heta moža stać pryčynaj dla ŭmiašalnictva dziaržavy ŭ rehulavańnie cen.

Takija abmiežavańni nie dazvalajuć ni retejleram, ni vytvorcam atrymać prybytak. Apošnija pierachodziać na vytvorčaść bolš dachodnaj pradukcyi, takoj jak syr, i ŭ toj ža čas tłumačać spynieńnie pastavak deficytam syraviny.

U Ministerstvie sielskaj haspadarki Rasii tłumačać rost popytu na masła rostam dachodaŭ nasielnictva i zajaŭlajuć, što rasijski rynak u poŭnym abjomie zabiaśpiečany hetym vidam pradukcyi. Jaho vypusk navat na 1,6% pieravyšaje minułahodni pakazčyk.

Vytvorcy ŭ svaju čarhu papiaredžvajuć, što ŭ zonie ryzyki taksama inšy samy nierentabielny dla ich tavar — małako ŭ pakietach. Jano taksama moža ŭ chutkim časie źniknuć z palic.

Na fonie rostu cen, jak paviedamlajuć rehijanalnyja vydańni, pavialičyłasia kolkaść kradziažoŭ masła z mahazinaŭ. Jaho pačali vydavać asabista ŭ ruki na kasie ci zapakoŭvać u płastykavyja kantejniery.

Vice-premjer Rasii Dźmitryj Patrušaŭ na naradzie z udziełam pierapracoŭščykaŭ i vytvorcaŭ małočnaj pradukcyi daŭ šerah daručeńniaŭ dla stabilizacyi cen na masła na rasijskim rynku. Jon zajaviŭ, što ŭrad praciahnie kantralavać situacyju z cenami na jaho.

Kab stabilizavać ceny, ułady majuć namier pavialičyć impart hetaha praduktu z šerahu krain, u tym liku ź Biełarusi.

Situacyja z masłam nahadvaje situacyju ź jajkami, jakaja była ŭ Rasii ŭ kancy minułaha hoda. Tady za dva miesiacy jajki vyraśli ŭ canie na 30% i naziraŭsia ich deficyt. Tady situacyju stabilizavali pastaŭki z Azierbajdžana.

• 3
• 0
• 8
• 1
• 0
• 0
• 0
• 0